Meclîsê Ciwanan ê HDPyî bi şîarê 'Ciwananê rêxistinkerdeyan reyde, ver bi ameyoxêkê azadî' konferansê xo yo 3. Salona Konferansî ya qezaya Peyasî ya Amedî de kerd. Sere de Hemserekê HDPyî yê Amedî Gulîstane Atasoy û Zeyad Ceylan, wekîlê HDPyî Murat Sarisaç û Vervatoxa Meclîsê Ciwanan Dêrsime Dag xeylêk ciwanî tewrê konferansî bîyî. 

Polîsan cigêrayîşî ra dima ciwanî girewtî salone û wextê cigêrayîşan de ciwanêko 16 serre ame destbendkerdene.

Salona konferansî de fotografanê Nagîhane Akarsel, Hevrîne Xelef, Denîze Poyraz û Jîna Emînî reyde, pankartê bi nuşteyê 'Ciwanî bi têkoşînî vera îxanetî ser kewenê' ameyî daliqnayene. Ciwanan vera sloganê sey "Bijî Serok Apo" , "Ciwan fedayîyên Rêber Apo ne" vatî.

Konferans de verî Dêrsim Dag qisey kerd û ard ziwan ke îqtîdarê AKP-MHPyî hêrişê îrade û sîyasetê demokratîkî yê ciwananê kurdan keno coka ê qerardar ê ke pêro ciwanan bi rêxistin bikerê. Dêrsime Dag vat: ''Îqtîdaro nikayên wazeno ke ciwanan goreyê hişmendîya xo weye bikero. Coka ewro zanîngehî bîyê warê serewedaritişî.'' 

Dêrsime peynîya qiseykerdişê xo de hîrê şehîdê Qirkerdişê Parisî yad kerdî û vat: ''Ma soz danê înan ke haştîye û azadîye bîyarê nê welatî. Ma dîaspora ra heta Başûrî, zîndanan ra heta waran têkoşînê xo rê do dewam bikerê. Senî ke her ca de tecrîd est o, tede têkoşîn zî est o. Ma reyna soz danê ke bi têkoşînê xo Birêz Ocalan û şarê kurdî azad bikerê.''

Wekîlê HDPyî yê Wanî Murat Sarisaçî zî destpêkê qiseykerdişê xo de dîyar kerd ke qerebalixîya salone nîşaneya pîlbîyayîşê têkoşînî ya û vat: ''Tîya de mesajê 'Ma bi ciwanan dest pêkerd û bi ciwanan do biqedînê' yeno dayene. Ê hêzê ciwanan ra tersenê. La têkoşînê ciwanan her ca de beno pîl.''

Sarisaçî zî bale ante tecrîdê Îmraliyî ser û vat: ''Wexto ke berê Îmraliyî qefilîyayî tecrîd bi giranêr berê şerî zî abîyî. Birêz Ocalan têna şexsêk nîyo; ey tarîxê têkoşînê 50 serrî newe ra afernayo. Azadîya ey bi têkoşînê ma do bêra caardene.''