Dîwanê Hemserekîye yê KONGRA-GELî derheqê erdlerzê Kurdîstanî de eşkerayîye weşana.

Eşkerayîya KONGRA-GELî wina ya:

‘‘Wa rehma Homayî ê merdiman ser o bo ke erdlerzî de dinyaya xo bedilnaya, ma birîndaran rê zî şîfa wazenê, keyeyanê qurbananê erdlerzî rê serweşîye wazenê, dejanê înan pare kenê. Gere şarê ma bi ruhê seferberîye wayîrê yewbînan bivejîyo.

Verê ke no erdlerz biqewmîyo, nîşanê ci est bî. Zanyaranê pisporan seba erdlerzî heşar kerdbî û vatbî, do demêko nezdî de erdlerzêk biqewmîyo, gere tedbîrî bêrê girewtene. La hukmatê Erdoganî û sazgehê ey goşê û çimê xo girewtî.

‘Berpirsîyaro yewin ê rijyayîşî Erdogan o’

Pereyo ke bi serran o ke bi nameyê ‘bacê erdlerzî’ yeno arêdayene, dîyar nîyo ke dayî kura û kamî. Erdoganî Tirkîya kerda şantîyêka betonî ya rantî. Coka berpirsîyaro yewin ê rijyayîşî ke ameyo şarê ma ser o, Erdogan bi xo yo.

Erdogan û hukmatê xo nêverdanê ke hetkarîya şarî biresa mexdûranê erdlerzî. Bi îlankerdişê Halê Îstîsnayî û ferzkerdişê AFADî hema zî fek partîzanîye ra nêverdanê. Sîstemê Erdoganî ey binê xirban de mend.

 ‘Garê şarê ma bi xo çareyêk peyda bikero’

Gere şarê ma yo welatperwer paweyê kesî nêvindo û bikewo gêrayîş û têwgêrayîşî mîyan. Şarê ma birêxistin o, fedekar o, destakerde yo. Hemverê na felakete de refleksê xo yê xopawitişî pêt o. Ma bawer kenê ke şarê ma do xo rêxistine bikero û bi ruhê seferberîye qîmê xo bikero. Çend astengîyê AKP-MHPyî vernîya înan de bibê zî  gere şarê ma nêvindo û mexdûran tena, bêçare û bêhêvî nêverdo û teqez gere xo biresno înan.

Şarê ma yê çar parçeyê Kurdîstanî û teberê welatî, gere bi raya Heyva Sor a Kurdîstanî hetkarîyanê xo biresno şarê ma. Hetkarîyî ke bi raya bîne yenê erşawite, yenê serdestkerdene. Nê wextê zor û zehmetan de ma merdimanê xo nêkerê hewcedarê namerdan.’’