Dîwanê Hemserekîya KONGRA-GELî b wesîleya serrgêra Komployê 9ê Teşrîna Verêne yê vera Rayberê Şarê Kurdî Abdullah Ocalanî eşkerayîyêke daye.

Eşkerayîye wina ya:

''Ma xoverdayîşê Îmraliyî yê Rayber Apoyî selam kenê û şehîdanê 'Şima nêeşkenê tîja ma tarî bikerê' bi minet û rêzî yad kenê. Ma pêro komplogeran bi nefretî şermezar kenê.

Rayber Apoyî kurdî verê qirkerdişî ra xelisnabi, rêxistin kerdî û bi fedakarî ablûqaya Peymana Lozanî ra vetî. Coka Rayber Apo bi hedefê Komployê Mîyanneteweyî. Komplogeran armanc kerdêne ke Peymana Lozanî bidê dewamkerdene, kurdan qir bikerê. La Rayber Apoyî bi paradîmaya xo ya neteweya demokratîke, komelê ekolojîkî û azadîgîrîya cinîyan komplo pûç kerd.

Şarê kurdî bi paradîgmaya Rayber Apoyî aver şi, Şorişê Rojawanî qewimîya û felsefeya 'jin, jiyan, azadî' bîye hêvîya pêro cinîyanê dinya. Seba ke Rayber Apoyî ra qesasê ney bêro girewtene sîstemê Îmraliyî ronîya. Îmrali de qet yew qanûn nêano caardene. Hêzê mîyanneteweyî yê ke hemkarê dewleta tirke yê, verê nê tecrîdê Îmraliyî de bêveng ê. 

Rixmê polîtîkayanê şerî ya topyekûnan ê AKP-MHPyî zî têkoşînê azadîye û xoverdayîşê Îmraliyî Planê Çokdayîşî pûç kerd. Coka dewleta tirke seba ke xo bixelisna keyeyê Barzanîyan de hemkarîye viraşte. Şarê Başûrî rîyê Barzanîyan ra reyna hedefê qirkerdişî de yo. Ganî şarê Başûrî vera hêrişanê dewleta tirke tewir bigêro û hemkarê îxanetî nêbo. Pêkerdişê dewleta tirke û Barzanîyan do bibo sebebê rijîyayîşê înan. 

31 mengî yo Rayber Apoyî ra xeberêke nêna girewtene. 25 serrî yo o binê sîstemê qirkerdişî de yo. Seba ke embazîya ma 'kêm a' no esaretê Îmraliyî 25 serrî yo dewam keno. Ma do bi azadkerdişê Rayber Apoyî bieşkê rexneyanê xo bidê. Ganî ma bi caardişê paradîgmaya azadîye cewab bidê xoverdayîşê Rayber Apo û gerîlayan. 

Ganî her kes serrgêra 25. ya Komployê 9ê Teşrîna Verêne de tewrê çalakîyan bibo. Ganî pêro dinya hêrsê kurdan û dostanê înan bivîna û vengê nê hêrsî bieşnawa.''