Kongreya PESî de bale ancîya tecrîdê serê Rayberê Şarê Kurdî Abdullah Ocalanî ser.

Heyetêk ke hetkarê hemserekê pêroyî yê HDPyî û parlamenterê Amedî Hîşyar Ozsoy, parlamentera Wanî Bedîa Ozgokçe û temsîlkarê Brukselî Eyyup Doruyî ra ameyêne ra seba tewrbîyayîşê kongreya Partîya Sosyalîste ya Ewropa (PES) Lîzbon de yê. Eşkerayîya nûştekîye ya HDPyî de vajîya ke “heyetê ma çarçiwaya kongre de dormeyanê cîyayan dir xeylî pêvînayîşî kerdî. Parlamentera ma Bedîa Ozgokçe bale ante tecrîdê serê birêz Ocalanî, grevê vêşanîye ya Leyla Guvene û halê Selahattîn Demîrtaşî ser.”

DERHEQÊ TECRÎD Û GREVANÊ VÊŞANÎYE DE HAYÎDARÎ DÎYAYE

Kombîyayîşo ke bi meymandarîya serekwezîrê Portekîzî Antonio Costayî virazîya, ke tede rayberê partîyan, temsîlkarê hukmat û partîyanê sosyalîst û sosyal-demokratan ê Ewropa zî hadre bî, hetkarê hemserekê HDPyî Hîşyar Ozsoyî zî bale ante qewimîyayîşanê sîyasîyan ê Tirkîye ser. Ozsoyî rixmê qerarê MHME de nêveradîyayîşê Demîrtaşî zî ard vîrî û meseleyanê tecrîd, grevanê vêşanîye, prosesê weçînitişî û zextanê serê HDPyî de fikrê xo ardî ziwan.

Serekê partîyanê sosyal-demokratan ê Ewropa, serekwezîrî û wezîrê Parlamentoya Ewropa zî tewrê kongreya PESî benê. Kongre do ewro bi qiseykerdişanê temsîlkara berze ya Karê teberî û Polîtîkayê Asayîşî yê Yewîya Ewropa Federica Mogherini û serekwezîrê Portekîzî António Costayî biqedîyo.