Kremlînî cewab da Erdoganî: Operasyon senaryoyo tewr xirab o

Kremlînî vatişê Erdoganî yê ''Têgêrayîşê vera Îdlîbî nêzdî de yo.'' rê cade cewab da. Vervatoxê Kremlînî Dimitry Peskovî vat: ''Operasyonê leşkerî yê Tirkîya yê vera Îdlîbî beno senaryoyê tewr xirabî.''

Serekkomarê Tirkîya Recep Tayyîp Erdogan vatbi: ''Têgêrayîşê vera Îdlîbî nêzdî de yo.'' Kremlînî cade cewab da nê vatişê Erdoganî. Vervatoxê Kremlînî Peskovî vat: ''Eke Tirkîya vera hêzê hukmatê Sûrîye Îdlîb de operasyonêkê leşkerî bikero no beno senaryoyê tewr xirabî.''

Erdogan kombîyayîşê gruba xo de qisey kerd û vat: ''Ma seba hêzanê rejîmî hîşyarîya peyêne kenê. Têgêrayîşê vera Îdlîbî nêzdî yo. Ma Îdlîn nêdanê rejîmî û paştdayoxanê ci. Ma beno ke şewêke bêrê Îdlîbî. Ma qerardar ê ke Îdlîb seba Tirkîya û şarê herême bikerê cayêkê biasayîşî.''

Peskovî derheqê nê vatişanê Erdoganî de vat: ''Ganî ma goreyê senaryoyê tewr xirabî ercnayîş nêkerê. Eke Îdlîb de vera cerganê terorîstan operasyonêk do bêro kerdene no do çarçewa peymana Saçî de beno. Cara no berpirsîyarîya Tirkîya ya. La eke derheqê operasyonê vera hukmatê Sûrîye û artêşa Sûrîye de çîyêk yeno vatene no do bibo senaryoyê tewr xirabî.''

Wezîrê Karanê Teberî yê Rûsya Sergey Lavrovî zî da zanayene ke pêvînayîşê Moskova yê mabênê heyetê tirkî û rûsî de pêkerdişêk nêame caardene.