Serekkomarê Tirkîya Erdogano ke tim elewîyî hedef kerdêne, Cemxaneyê Huseyîn Gazîyî yê Anqara zîyaret kerdbi û zîyaretî xeylêk nîqaşî xo dir ardbî. Hemserekê Pêroyî yê Komeleya Elewîyanê Demokratîkan (DAD) Musa Kuluyî derheqê babete de Ajansê Mezopotamya rê qisey kerd. 

Kuluyî vist vîrî ke elewîyî wextê Osmanîyan û bi taybetî wextê Abdulhamîtî de raştê hêrişî ameybî û ey îfade kerd ke îqtîdarê AKP-MHPyî zî sey dewamê rejîmê Abdulhamîtî yo. Kuluyî vat: ''100 serrî yo polîtîkaya ke tirkayetî û misilmanîye ferzê her kesî kena, yena caardene. Îqtîdar seba ke îqtîdarîya xo rê dewam bikero xo rê dişmenan peyda keno. Nika destê îqtîdarî de ne kozê Sûrîye ne zî kozê Iraqî mendo.  Îqtîdar xîret keno ke elewîyanê xo biaferno. Coka merdimanê xo anê serê dezgehan û xîret kenê ke hêzê bînî bikêmîyê. Zîyaretê Cemxaneyê Huseyîn Gazîyî mîsalê ney o. Îqtîdar seba ke elewîyanê xo biafernê hewceyê zîyaretêkê winasênî bi. La ser nêkewt û do ser nêkewo.''

Kuluyî dîyar kerd ke heta ke îqtîdar kerdişanê vera elewîyan de têrî nêro zîyaretê ci bêmane do bimanê û vat: ''Îqtîdar ganî qirkerdişanê Madimak, Mereş, Dêrsim û Şêx Seîdî; heta nika dewlete se kerdo qebul bikero û nînan de bêro têrî.''

Kuluyî da zanayene ke elewîyî têna wazenê bi ziwan, bawerî, kultur û vîrê xo biciwîyê û vat: ''Ma tim nê erdî de bîyî, ma wayîrê esasî yê nê erdî yê. La înan kerd ke ma bikerê kole, ma zî seba ke kole nêbê xo ver da. Ma do qetî xîretanê seba bawerî, ziwan, kultur û vîrê xo ra fek vera nêdê.''