Karkerê kurdî qeraxê Kadikoyî de seba ke govende girewtêne polîsan înan rê îşkence kerdbî û dima zî destbend kerdî. Karkerê kurdkî hetê Mehkemeya Ceza ya Sulhe ra bi îdîaya 'nêverdayê ke polîsî wezîfeyê xo bikerê' bi şertê kontrolê edlîyî vera dîyayî. Wekîlê Partîya Çep a Keske Cengîz Çîçek, avûkatanê OHD û ÇHDPyî verê edlîye de pê slogan, deyîranê bi kurdkî û çepikan karkerî pêşwazî kerdî. Karkeran ANFyî rê qala kerdiş û îşkenceyê polîsan kerde.

Karkerê înşaetî Kadîr Gulşenî ard ziwan ke wexto ke polîsî ameybî înan govende nêgirewtêne, roniştêne û vat: ''Polîsan nasnameyê ma pers kerdî. Polîsan hacetê goşdarîkerdişê muzîkî pers kerd û dest na ser. Polîsan lajê emika mi berd verê wesayîtî, ma vera ney nêrazîbîyayîşê xo mojna û polîsan gazê îsotî verda ma ser. Dima polîsan nişka ra çekê xo antî û guleyî verdayî hewayî. Polîsan ma berdî qereqolî. Mehkeme bi şertê hepsê keyeyî  ma vera dayî. Ez seba karî ameya Îstanbulî. Nika neçare ya abigêra Amedî û keye de vindea. Înan hem ez hem zî keyeyê mi kerdî mexdûr.''

Karker Seyîthan Gulşenî zî dîyar kerd ke polîsan pê îşkenceyî ê destbend kerdê. Seyîthan Gulşenî vat: ''Polîsan zereyê wesayîtî de zî da ma ro. Qereqol de polîsan pey ra ma kelemçe kerdî, erdî ra derg kerdî, da ma ro, çekê xo antî û reyna zî înan gerreyê ma kerd. Înan zereyê wesayîtî de pê zorî merşê mehterî pê ma da goşdarîkerdene. Qereqol de înan pê lingan ma eciqnayî. Polîsan ma rê gef werd ke ma raporê derbe nêgêrê. Înan ma rê heqaret kerd û vat 'Wa bimirê terorîstî.' ''

Karkeran ra Îdrîs Akpinarî îfade kerd ke seba ke înan pê telefonî dîmenê serebûtî girewtî, polîsan hêrişê înan zî kerd.