Paytextê Belçîka Bruksel de vizêr temsîlkarê bi desan partî û dezgehanê kurdan ke ameyî têhet, aktîvîteyê  xo yê ke do serra seyine ya Pêkerdişê Lozanî de bikerê safî kerdî. Serra 2023yî de sere de Lozan do xeylêk merkezanê Ewropa de çalakîyî bêrê kerdene.

Aktîvîteyê ke mîyanê înan de konferans, panel, ramotişê fîlman û konserî zî est ê do sibat de dest pê bikerê û heta teşrîna verêne dewam bikerê. Fînalê çalakîyan do bi mehkemeyêka hîrê rojan bêro kerdene.

Hemserekê KNKyî Ahmet Karamusî ke kombîyayîş de qiseykerdişê akerdişî kerd, vist vîrî ke ke kurdan Pêkerdişê Lozanî ra senî dejî antî û vat ganî kurdî vera nê pêkerdişî têkoşînê hemparî bikerê.

Reyna sîyasetmedaranê bînan ê kurdan zî qiseykerdişanê xo de bale ante muhîmîya yewîya kurdan ser û vat ganî narey kurdî vînî mekerê, bibê yew û wayîrê ercanê xo bivejîyê.

Badê qiseykerdişan aktîvîteyê ke do bêro kerdene ameyî plankerdene. Goreyê nê sere de Lozan xeylêk welatanê Ewropa de do aktîvîteyî bêrê kerdene. Aktîvîteya tewr pîle do mabênê 20 û 24ê temmuze de Lozan de bêro kerdene. Mîyanê aktîvîteyan de  konferans, panel, konser û ramotişê fîlman est ê.