Xeylêk şaristananê Vakurê Kurdîstanî û Tirkîya de hêrişê îşxalî yê vera Başûrê Kurdîstanî û hemkarîya PDKyî ameyî protestokerdene.

Dêrsim de Rêxistina DEM Partî eşkerayîyêke daye û hêrişî protesto kerdî. DEM Partî waşt ke Kuçeyê Hunerî de çalakîya xo bikera la polîsan girse asteng kerd. Girseyî çepikan polîsî protesto kerdî. Çalakîye de polîsan kesêk zî destbend kerd.

Semsûr de Rêxistinanê DEM Partî û DPyî û Têgêrayîşê Cinîyan ê Azadan (TJA) Parka Demokrasîyî de eşkerayîyêke daye û hêrişî şermezar kerdî. Çalakîye de sloganê ''Îxanet û hemkarîye rê ney'' ameyî vatene.

Bedlîs de Rêxistina DEM Partî qezaya Tetwanî de bi  eşkerayîyêke hêrişî protesto kerdî. Verê bînaya DEM Partî de eşkerayîye ameye wendene û xeylêk kesî beşdarê çalakîye bîyî. Hemserekê DEM Partî yê Bedlîsî Fîkret Bîrlîkî eşkerayîye wende û vat ke ê do nêverdê ke erdê Kurdîstanî bêro îşxalkerdene.

Îstanbul de Meydanê Şîşhane de warê çalakîya nobete ya vera qeyûmî de DEM Partî çalakîyêke kerde. Çalakîye de sloganê sey “Bijî berxwedana Rojava” û "Bimire xiyanet, bijî berxwedan'' ameyî vatene. Hemsereka DEM Partî ya Îstanbulî Gonca Yavuz eşkerayîye wende û hêrişî şermezar kerdî. Gonca vat ke PDK seba menfaetanê xo Herêma Kurdîstanî qurbanê Tirkîya keno. Hemvervatoxê HDKyî Cengîz Çîçekî zî vat ke bi têkoşînê xo ê do îxanetî bin bivisnê.