Kurdîstanijî xeylêk cayan de vengdayîşê KCKyî ser o seba azadîya Rayberê Şarê Kurdî Abdullah Ocalanî vejîyayî meydanan û rayîrî ra şîyî.

Bordeaux

Bordeaux de roja şemeyî çalakîkerî ameyî pêser û heta meydanê Victorie rayîrî ra şîyî. Çalakîkeran pare kerd ke ê wayîrê vengdayîşê KCKyî vejîyenê. Çalakîye de xoverdayîşê Heftanînî rê zî selam ame kerdene.

Ahmed Semsûrî Meclîsê Komelê Demokratîkî yê Kurdan ser o qisey kerd û vat: ''Heta ke Rayber Apo azad nêbo ma sey şarê kurdî do meydanan de bibê. Ganî her kes wayîrê nê têkoşînî bibo.''

Tirbêsipî

Şarê Tirbêsipî yê Kantonê Qamişloyî vera tecrîdê Rayberê Şarê Kurdî Abdullah Ocalanî rayîrî ra şîyî. Kurd, ereb, suryan û êzidîyî tewrê rayraşîyayîşî bîyî. Rayraşîyayîş de selam ame kerdene xoverdayîşê Heftanînî. Rayraşîyayîş dima vurîya nawnayîş.

Fermandarê Hêzanê Pawitişê Cewherî (HPC) Nasir Yunisî nawnayîş de qisey kerd û vat: ''Bi tecrîdê Rayber Apoyî wazenê pêro şar asteng bikerê. Azadîya Rayber Apoyî azadîya şaranê Rojhelatê Mîyanênî ya.''

Erîvan

Kurdanê Armenîstanî vengdayîşê KCKyî ser o qezaya Oktoberyanî ya Erîvanî de hêverî kombîyayîşêk kerd û dima zî eşkerayîyêke daye.

Endamê Komîteya Kurdîstanî Milo Kalaşyanî eşkerayîye de qisey kerd û hamleya seba azadîya Rayberê Şarê Kurdî Abdullah Ocalanî rê selam kerd. Kalaşyanî îfade kerd ke xoverdayîşê şarî û gerîlayî do peynîya tecrîdî bîyarê.

Eşkerayîye bi sloganan qedîyaye.

London

Kurdîstanijî û dostê înan London de ameyî pêser û bi sloganan seba Rayberê Şarê Kurdî Abdullah Ocalanî rayîrî ra şîyî. Çalakîye de bi kurdkî û îngîlîzkî eşkerayîyî ameyî wendene.

Kampanyaya Ocalanî rê Azadîye û Kampanyaya Kurdîstanî rê Azadîye zî tewrê çalakîye bîyî.