Grevê vêşanîye yê bêdem û bêagêreayîşî yê xoverdayoxanê PKK û PAJK’î yo ke seba wedaritişê tecrîdî Rayberê Şarê Kurdî Abdullah Ocalanî ame bi destpêkerdene, roja 47’ine de yo.

Cengaver Aykûlo ke 6 serrî yo hepisxane de yo û 17 serrî ‘ceza’ ci ameya birnayene, Hepisxaneyê Asayîşê Berzî yê Hûmara 5’ine yê Xarpêtî de çalakîya xo ya grevê vêşanîye domneno.

Pîyê Latîf Aykûlî ard ziwan ke, lajê ey roja destpêkerdişê grevê vêşanîye ra no het 10 kîloyî kerdê vîndî û wina dewam kerd: “Ma şîme hem pêvînayîşê akerdî û hem zî girewteyî. Rewşa eyî ya weşîye sey verî başe nîya. Xora verçimikanê giranan şanêno çimanê xo ver. Labêlê dima ke dest bi grevê vêşanîye kerd, tansîyanê ey reşt der-dorê (sînorê) 8/4'î. Hewna dewqe û dejê sereyî her ke şono vêşî beno. Bêhal o û 10 kîloyî kerdê vîndî.

Aykûlî qalê muşahedeyê xo yê wextî pêvînayîşî kerd û vat, “Girewteyî bi giranî weçînitişê HDP’yî meraq kenê. Persenê ‘HDP do serbikewo ya ney.’ Reyna, HDP, ÎHD, baro û Komelê Keyeyanê Girewteyan ra wazenê ke seba çalakîya grevê vêşanîye paştdayîş biderê û bikewê mîyanê têgêrayîşî. Ma zî parlamenteranê xo ra, partîya xo ra, ÎHD û baroyan ra wazenîme ke nê meseleyî reyde eleqedar bibê.”