Leyla Guvena ke semedê protestokerdişê tecrîdê serê Rayberê Şarê Kurdî Abdullah Ocalanî dest bi grevê vêşanîye kerdibi, 1 menge cezaya disîplînî dîyaye ci.

Hemsereka Kongreya Cematî ya Demokratîke (KCD) û parlamentera HDPyî ya Colemêrgî Leyla Guvena ke semedê protestokerdişê tecrîdê serê Rayberê Şarê Kurdî Abdullah Ocalanî Zîndanê Girewteyî yê Tîpê Eyî yê Amedî de dest bi grevê vêşanîye kerdibi, grevê ci yê vêşanîye kewt roja xo ya 14ine. Dimayê çalakîya aye ra hetê Mudurîya Sazîya Înfazê Ceza yê Tîpê Eyî yê Amedî ra tehqîqatê disîplînî amebi destpêkerdene.

Çarçiwaya tehqîqatî de pawitişê Guvene gîrîya. Guvene pawitişê xo de vat problemo tewr pîl ê Tirkîye meseleyê kurdan o û Ocalano ke wazeno no mesele hal bibo binê şertanê tecrîdî yê giranan de yeno girewtene.

Guvene dewamê pawitişê xo de nê vatî: “Ez sey parlamenterêk ke hetê şarî ra amîya vîjaneyene, seba aşitîya cimatkîye virazîyo û ez mesuldarîyê ke şarî dayê mi bica biyarî bawer kena ke ganî tavilî tecrîdê serê birêz Ocalanî bêro wedartene. No grevêko merdimayî û exlaqî yo. Tu zirarê nê grevî îdareyê zîndanî rê yan zî rayapêroyîye rê çinyo û sûc nêyo.”

CEZAYA DISÎPLÎNÎ DÎYAYE

Mudurîya zîndanî zî bi îdîaya ke “do grevê vêşanîye asayîşê sazîye bikero zihîf ” goreyê fiqraya 2. ya bendê (g)yî yê madeyê 40. yê qanûnê bi hûmara 5275î cezaya 1 mengêk ra heta 3 mengî tayê aktîvîteyan ra mehrûmmendişî daye.