Leyla Guvene waşt ke ‘çalakîyê fedaîyî’ bêrê caverdayene

Hemsereka KCD'yî Leyla Guvene derheqê çalakîyanê fedaîyan ê ke zîndanan û teber de yenê viraştene de peyamêk da û waşt ke çalakîyê bi nê hawayî nêrê viraştene, la xoverdayîşî hîna bêrê girdkerdene û vat, “Ma roja wedaritişê tecrîdî pîya pîroz bikerê.”

Hemsereka KCD'yî û parlamentera HDP'yî ya Colemêrgî Leyla Guven a ke seba wedaritişê tecrîdkerdişê Rayberê Şarê Kurdî Abdullah Ocalanî 137 rojî yo grevê vêşanîye de ya, derheqê çalakîyanê fedaîyan ê ke zîndanan û teber de yenê viraştene de bi rayîrê Radyoyê Dengê Welat peyamêk da.

Serkewtiş zaf nêzdî yo

Leyla Guvene ard ziwan ke çalakîye reşta merheleya bîne û seba ke nêtîce bigêrê tay mend û wina dewam kerd,  ”Tarîx de reya verêna bi hezaran çalakîya grevê vêşanîye yê bêdem û bêagêrayîşî de seba wedaritişê tecrîdkerdişî xo ver ro danê. Tewr kes nêeşkeno vajo ke bi na çalakîye netîce nêno girewtene. Bi qetî do netîce bigêra, qetî ser bikewa. Eslê ci de netîce girewt. Sey laseran merdimî herikîyayî wareyanê Newroze, tewrê bîyayîşê şarî, bi slogana cinî û ciwanan serkewtiş û wayîrvejîyayîş reşt sewîyêka tewr berze. Şarî reya bîne vat, ’Ma cuyêka mîyanê tecrîdî qebûl nêkenê, tecrîdkerdişê Rayberê Kurdî tecrîdkerdişê ma yo, ma do na cuye qebûl nêkenê’. Serdestan zî bi mîlyonan merdimê ke vejîyayê wareyê Newroze dîyî û bawer kena, se ra se zî hesabê ci kenê ke senî mîyanê nê xebatî rê bivejîyê. Ê yê ke tengasîye de ma nîyî, ê yê ke tengasîye de, nêzanê senî gaman bierzê AKP û MHP’yî yê. Çunke verê înan de weçînayîş esto, seba naye zî bêçare mendê ke nêzanê ke çi bikerê.

Seba netîcegirewtiş tay mend

Hemrayî, seba netîcegirewtişî tay mend.  Ez zerrî û can ra vînena û vana, ganî ma dormeyê çalakwanan de bibê xeleke, xelekêka vîr û hêvîye. Çunke serkewtiş nêzdî yo, ma do se ra se ser bikewê.  La ma wazenê ke hevalê ma yê nika zindana de çalakîya xo dewam kenê, heta peynîye zî bi moral, bi coş mîyanê aramîye de çalakîyan dewam bikerê. Seba naye zî hevalê ma yê ke nika mîyanê çalakîye de yê, ganî dormeyê hevalan de bibê kom.

Herinda merdişî de ciwîyayîş bikerê xo ver

Hevalanê ma çalakîyê fedaîyî viraştî. Heval Zulkuf, Ûgûr, Aytene. Ez vera çalakîyanê înan de bi rûmet bena çewt. Înan bi ruhêkê fedaî waşt ke bêvengîya bişiknê.  La ez wazena bivaja, wa bêro zanayene ke her hevalêk bi nê çalakîyan parçeyêk leşa mi ra, ruhê mi ra, zerrîya mi ra beno. Verê nê çalakîyan ez rêz gêna. Ma vanê, xora çalakîyêka ke ma dest pêkerda esta, xora ma mîyanê çalakîye de yê. Ma ameyê merheleyêka nêzdîya ke ma netîce bigêrê; gelê hevalan ganî ma dormeyê çalakwanan de ca bigêrê. Ma çalakîyanê neweyan nêkerê. Nê çalakîyê ke bi ruhê fedaî yenê viraştene zaf biqîymet ê. Merdim nêeşkeno derheqê înan çîyêk bivajo.  Labelê seke ma vat, hetê Rayberê Şarê Kurdî ra zî zaf reyan nê çalakîyî ameyî ercnayene. Ame vatene ke ‘Ganî şima merdişî ney, ciwîyayîşî bikerê xo ver’. Ganî şima seba cuyêka bianore xoverdayîşê xo girdtir bikerê.

Dormeyê çalakîye de kom bibê û nê çalakîyanê fedaîyan nêvirazê

Ez wazena ke şima zî, sey hevalanê zîndanan dormeyê çalakîye de kom bibê û nê çalakîyanê fedaîyan nêvirazê.  Bi rastî nê mi hêz ra kenê. Ez çi bikera zî, zaf tesîrê ci de manena, barê mi girantir beno, ez bi nê hawayî nêeşkena aver de şora. Ez hevalanê xo ra hêvî kena ke ê zî bi nê hawayî têgêrayîş kenê û ma do çalakîya xo ser bikewê.”