Qezaya Licikî ya Erzînganî de 13ê sibate de qezayê madenî qewimîya û 9 karkerî binê xirbeyî de mendî. Heta nika cenazayê 4 karkeran ameyî vetene la cenazayê 5 karkeran hema zî binê herre de yê.

Seba her hetê na facîa bêro eşkerakerdene meclîs de  “Komîsyonê Cigêrayîşî yê Qezayê Madenî yê Licikî” ame ronayene. Wekîlê ke endamê komîsyonî yê 7-8ê gulane de Licik de cigêrayîş kerd.

Wekîlê DEM Partî yê Çewlîg û Dêrsimî Aytene Kordu û Omer Faruk Hulaku yê ke tewrê cigêrayîşê Licikî bîyî Ajansê Mezopotamya rê qisey kerd.

Hulakuyî ard ziwan ke înan keyeyê kesanê ke dinyaya xo bedilnaye û binê herre de mendî, zîyaret kerdî û nê vatî: “Keyeyan vat înan vera telukeyê rijnayîşî îdarekarê şîrketî hîşyar kerdî la înan xebatê xo domnayî. Keyeyan vat îdarekarê şîrketî remayî şîyî teberê welatî. Ma do sey komîsyonî naye ser o vinderê. Tesbîtê ma yo verêne oyo ke zaf barkerdiş bîyo, coka xijbîyayîş bîyo. Licik de îhmalo eşkera est o. Rixmo ke qelişîyayîş est o tedbîrî nêameyî girewtene. Ma do heyna hewte îdarekaranê şîrketî goştarî bikerê.”

Aytene Kordu zî ard ziwan ke waştişê keyeyan oyo ke wa berpirsîyarî vejîye meydan û wîna vat: “Wezîrîyî û eleqedarî pêro cewabê persan erzenê yewbînan. Çew berpirsîyarîye nêgeno xo ser. Zafê persan nînê cewabkerdene. Komîsyon daha zaf xebatanê teknîkî keno la hetêkê na mesela sîyasî û polîtîk o. No pîya bi merdim û herra ci qirkerdişê xoza yo. No zîhnîyet ganî bêro bedilnayene.Şîrketê Anagoldî polîtîkaya îqtîdarî ya ‘vêşan biverde, bibestê xo ya’ rayra beno.”