London de polîsan 27ê teşrîna peyêne de eştbi Merkezê Komelê Kurdan ser û xeylê kesî destbend kerdbî. Destbendkerdeyî 14 rojan ra dima vejîyayî verê mehkeme. 

Destbendkerdeyan ra teyna Mazlûm S. û Agît K. bi hawayêkê têrîyî vejîyayî mehkeme ver. Roniştişê mehkeme de destbendkerdeyî seba ke tewrê çalakî û aktîvîteyan bîyê ameyê sûcdarkerdene.

Destbendkerdeyî bi 'endamîya PKKyî' ameyî sûcdarkerdene.

Avûkatan beraetê muwekîlanê xo waştî.

Dozgerî waşt ke Turkan Bûdak, Ercan Akbal, Alî Poyraz, Agît K. û B.K.  bi şertê kontrolê edlîyî vera bidîyê. La Mazlûm S. bi 'şikê remayîşî' tepişîya.

Avûkatê Mazlûm S.yî pare kerd ke ê do îtirazê tepişîyayîşî bikerê. Roniştişo bîn 20ê kanûne de yo.