Wezîra Zanistî û Teknolojî ya Îngilîstanî Feryale Clark Demîrcî xeyma grevê vêşanîye ya verê bînaya KCCyî zîyaret kerde û rexne kerd ke operasyon de polîsê tirkî şuxilîyayê. Feryale vat ke operasyonî yewparetîya komelî xera kerda.
Paytextê Brîtanya London de verê Merkezê Komelê Kurdan (KCC) de vera operasyonê sereştiş û destbendkerdişan xoverdayîşê kurdan bi grevê vêşanîye dewam keno.
Vizêr zî Wezîra Zanistî û Teknolojî ya Îngilîstanî Feryale Clark Demîrcî heyetêkî reyde xeyme zîyaret kerde. Feryala ke eslê xo de kurdêka elewî ya, xoverdayoxanê grevê vêşanîye de qisey kerd û ard ziwan ke ê bi hesasîyetî babete ser de vindenê.
Feryale rexne kerd ke operasyon de polîsê tirkî şuxilîyayê. Feryale ard ziwan ke operasyonî yewparetîya komelî xera kerda.
Wezîre Feryale vat: ''Ma derheqê operasyonî de selahîyetdaranê polîsan û wekîlan de qisey kerd, ma qesawetê xo zî ardî ziwan. Operasyon de polîsê tirkî şuxilîyayê. Ma pêvînayîşanê xo bi selahîyetdaran de vat ke ganî na babete de bi hesasîyetî têbigêrê. Ma Wezîrîya Polîsan û Asayîşî û Wezîrîya Karanê Zereyî de zî pêvînayîşî kerdî. Ma derheqê babete de muracat kerd ke Parlamento de babete rojdem biba.''
