Vera polîtîkaya hêrişkare ya dewleta tirke ya vera kurdan welatanê Ewropa de çalakîyî dewam kenê. Vizêr Paytaxtê Îngîlîstanî London de kurdî reyna kuçeyan de bî.

Çalakîya ke bi vengdayîşê Meclîsê Şarê Kurdî ameye kerdene bapesteyanê Têgêrayîşê Şorişgêrî yê Yewbîyayeyî yê Şaran (HBDH)  zî paştî daye ci. Çalakîye de Hemserekê Meclîsî Ercan Akbalî qisey kerd. Akbalî bale ante hêrişê îşxalî yê vera Herêmanê Pawitişî yê Medya ser û vat: ''Gerîlayî erjo esasî yê şarê kurdî yê. Wa dewleta tirke bizano ke gerîlayî şar bi xo yê. Polîtîkayê qirkerdişî do çirey ser nêkewo. No şar do peynîya Erdoganî bîyaro. Senî ke ê Zap û Garê de binkewtî do narey zî vera xoverdayîşê gerîlayan vîn bikerê.''

Bi nameyê Kurdish Solidarity Campaignî zî Nick Matheouyî qisey kerd. Matheouyî koyî sey dostê tewr pîlî ye kurdan name kerdî û vat: ''Faşîzm do vera xoverdayîşê koyanê şarê kurdî bieciqyo. Mifteyê azadîye koyanê Kurdîstanî de yo.''

Reyna qiseykerdoxanê bînan zî hêrişê îşxalî şermezar kerdî û semedê wayîrvejîyayîşê gerîlayan û pîlkerdişê têkoşînê hemparî veng da.