Merkezê Şarê Demokratîkî yê Londra de 14’ê Adere de grevê vêşanîyê yê bêdêm- bêagêrayîşî ame destpêkerdene. Çalakîye de Nahîde Zengîne, Mehmet Saît Yilmaz û Alî Poyraz ca gênî.

Çalakwanan ra Nahîde Zengîne ard ziwan ke a no demo tarîxî yê xoverdayîşî de nêeşkena bêveng vindere, waşt ke rolê xo kay bikerê û bestpa: ‘‘Ma tecrîdkerdişê Rayberîye qebûl nêkenê û semedê wedartişê tecrîdî ganî çîyêk bikerê. Na çerçewe de  waştişê xoverdayoxanê grevê vêşanîye yê ke rayberîya Leyla guvene de ameyî desptêkerdene, semedê ma talîmat o. Ma zî bi na çalakîye paşt danê xoverdayoxan û wazenê ke xoverdayîş hîna vila bikerê.‘‘

Mehmet Saît Yilmazî zî xoverdayişê çalakawanan ê grevê vêşanîye silam kerd û va: ‘‘Eke ma ewro vengê xo mevejê û no xoverdayîş de cayê xo nêgîrê , siba ma nêeşkenê qisey bikerê. Coka ma vanê ke no xoverdayîş de ma zî estî. Ma do bi girdkerdişê mucadeleyî ser bikewê.‘‘

Çalakwan Alî Poryazî zî bale ante polîtîkaya hêrişkare ya dewleta Tirkî ser û va: ‘‘Îtîfaqê AKP-MHP’yî wazeno ke bi zulm û zext ma  bitersno la ê ganî biewnîyê tarîxê Kurdan ra. Ma verê hêrişan de çok nêdanê, bi xurtkeridşê mecadeleyî cewab danê înan. Se beno wa bibo ma peyser game nêerzenê. Ma do bi xoverdayîş tecrîd bişiknê.‘‘