Parlamenterê HDP‘yî yê Dêrsimî Alîcan Onluyî  derheqê qerarê HDP'yî yê 3 bajaranê pîlan de namzed nêvejî ser o qisey kerd. Onluyî qiseykerdişê xo de va seba ke zemînê mucadeleyê şaran bibo yew no qerar ameyo girewtene. Reyna goreyê Onluyî xeylî kes û hetan de pêvînayîşan ra dima no netîce ameyo girewtene. 

QERAR TENA BI KOMBÎYAYÎŞAN NÊAMEYO GIREWTENE

Onluyî vat no qerar tena bi kombîyayîşanê Meclîsê Partîye  (PM) û Heyetê Rayberdişê Merkezî (MYK) nêameyo girewtene. Sey yew stratejîya weçinîyayîşî, xeylî wext o naye ser xebatî yenê kerdene û netîceyê pevînayîşan de no qerar ameyo girewtene û wina va:

“Hedefê ma yo yewin o yo ke, ganî ma şaredarîye yê ke sey mewzîyê şarê ma bîyî û ameyê gaspkerdene peyser bigîrê. Hetê bînî ra zî armancê ma o yo ke wa bi ney weçînayîşî yewîya neteweyîye bêro awankerdene. Verê yewîya neteweyîye akerdene û zemînê ci viraştene stratejîya weçînîyayîşî ya. Hedefê ma yo diyîn zî no yo; ma wazenîme ke rojawan de îtîfaqê MHP-AKP‘yî hêz ra bikewo. Çunke no blok keno ke rejîmê înkar û îmhayî aver bibero. Bi no qeyde ma nêwazenîme ke MHP-AKP‘yî ra yew mewzîyî peyser bigîrîme, senî ke Kurdîstan de bi îtîfaqê weçînîyayîşî ma yewîya neteweyîye hedef girewta, rojawan de zî wazenîme ke pêro hetê bînî bêrê têhet û yewîya muxalîfan bêro awankerdene û zemînê mucadeleyî bibo yew. No qerar, kombîyayîşan, şarê herême de pêvînayîş û şaranê rojawanî de pêvînayîşan ra dima ameyo girewtene.“

GANÎ HDP MÎSYONÊ XO YÊ TARÎXÎ BIYARO CA

Onluyî va HDP sîyaset de rayîro hîrêyîn a û wina dewam kerd: “Ma bi xebatanê xo yê şarî reyde ferq kerd ke di mîsyonê ma yê cîyayî estê. Ya yewine muxalefeto eslî nê la her het û her kesî rê hêvîbîyayîş, yanê mîsyonê partîya ke hêvîyê her kesî ya. Mîsyonê ma yo diyîn zî no yo; partîya ma ney şîyayîşê xirabî yê Tirkîya ver, rolêkê muhîmî de ya. O wext ganî ma di peyamî bidayêne. Ma pêro rexne û rîskî girewtî xo çim û fedakarîya winasîye kerde. No qerar seba ke paştdarîye bidîyo yew partîye û seba ke yew partîye bêro rexnekerdiş nêameyo girewtene.  Ma na fedakarîye seba ameyena şaran kenîme. Seba demokrasîya Tirkîya, seba talebanê haştîye yê Kurdîstanî, seba ke tecrîdê serê Rayberê Şarê Kurdî Abdullah Ocalanî  bêro wedaritene, ma no qerar girewto. Netîceyê ney weçînayîşî do yan rayîrê faşîzmî akero yan zî rayîrê demokrasî, çareserî û haştîye abikero. Seba naye zî ganî ma na fedakarîye bikerdêne.“

ŞARÎ NA FEDAKARÎYE HEQ KENÊ

Onluyî va HDP sey partîyanê bînan ca û mewkî ra zîyaderî wazena ke goreyê taleb û waştişanê şarî sîyasetê xo bîyaro ca û va seba ke Tirkîya bibo demokratîk no esas o. Onluyî va pêro şarê Tirkîya naye heq kenê û HDP zî naye ra partîya Şaran a.

ÎTÎFAQO KE DÊRSIM DE AMEYO RONAYENE DO ROJAWAN DE ZÎ TESÎR BIKERO

Dêrsim de zî dormeyê HDP‘yî de yew îtîfaq ameyo ronayene û no îtîfaq do meşte bêro îlankerdene. Onluyî derheqê îtîfaqê Dêrsimî de wina va: “HDP, EMEP, Partîzan, DBP, ESP û Temsîlkarê Sazîyanê Elewîyan ameyî têhet û yew îtîfaq viraşt. No îtîfaq tena Dêrsim de nê, tesîrê ci rojawan de zî do bêro hîskerdene. Zemînê ney îtîfaqî rojawan û Ewropa de zî esto.“