Vizêr şaristanê Kolnî yê Almanya de bi tewrbîyayîşê vervatoxê  Meclîsê Neteweyî yê Afrîkaya Başûre Leshesa Tsenoli, parlamentera HDPyî ya Mêrdînî û avûkata Ocalanî Ebru Gunaye û parlamentera verêne ya HDPyî Dîlek Ocalane panelêk ame viraştene. Moderatorîya panelî hetê rojnamegere Elîf Sonzamanciye ra amî kerdene.

Panel de ewilî partîya ANCyî ra vervatoxê Meclîsê Neteweyî yê Afrîkaya Başûre Leshesa Tsenoli qisey kerd û vat: “Ma mucadeleyê xo de Amonka vanê. Yeno manaya ‘heme hêzê ma seba şarî yo.’ Seba paştîdayîşê şima û serbestîya Ocalanî ma tîya yê.”   

PAŞTÎDAYÎŞÊ SEBA LEYLA GUVENE

Tsenoli derheqê grevanê vêşanîye de zî qisey kerd û vat ke grevê vêşanîye dinya de seba cigêrayîşê heqan rayîrêk o û nê vatî: “Ocalan muhîmîye dano tecrubeyê Afrîkaya Başûre. Na yewe ra ma mucadeleyê Kurdistanî rê spas kenê. Ma nûşteyanê Ocalanî wanenê. Ma bi vengê ê mucadeleyê Rojakewtena mîyanêne nas kenê. Mandelayî vatêne ‘heta Filîstîn nêbo azad azadîya ma bêmana ya.’ Ma zî vanê ke heta Kurdistan nêbo azad azadîya ma bêmana ya. Ma paştî danê çalakîya Leyla Guvene û ganî tecrîd tavilî bêro wedartene.” 

TECRÎD ÇIQA BENO XORÎ ŞER HÎNA BENO VÊŞÎ

Parlamentera HDPyî ya Mêrdînî û avûkata Ocalanî Ebru Gunaye zî qisey kerd û vat: “Mi avûkatîye zî kerde û rîyê qesasgirewtox ê dewlete dir amîya têrî. Sebebê apeygirewtişê qezencanê Îmraliyî xoverdayîşê Kurdan o. Hewna zî heyetêkê weşîye nêşîyo Îmrali û waştişê ma nêameyî qebûlkerdene.

Gama ke heyetê Îmraliyî persa û vat şertê şima yê prosesê çareserî ganî senî bibê, Ocalanî vat ‘wa şertê min ê weşîye, azadîye û asayîşî’ bêrê viraştene ke ez bieşkî proses rayra berî. Çiqa tecrîd beno xorî şer zî hende beno vêşî. Naye ra gama ke vajêno ma hemverê tecrîdî de yê no heman wextî de yeno manaya hemverê şerî de yê.” 

 ‘ÎMRALI DE HELM GIREWTIŞ ZÎ ZAF ZOR O’

Parlamentera HDPyî ya Mêrdînî ya verêne Dîlek Ocalane zî qiseykerdişê xo de nê vatî: “Mi bi çimanê xo sîstemê Îmraliyî dî. Mucadeleyî ercê zaf pîlî afernayî. Ercê ke hetê şehîdan ra ameyê afernayene ma pay ra gênê. Serekî vatêne ‘Eke prosesê çareserî derbe bigîrodo prosesê derbeyî dest pê bikero.’ Seba sîstemê Îmraliyî zî vatêne ‘Eke şima herinda mi de bibê şima nêeşkenê 3 rojî tîya bimanê, ez bîrîkê xorîyî de ya.’ Reyêk ez menga Temmuze de şîbîya, ûca biraştî girewtişê helmî zî zor bi. Hewayê ci rewayin bi. Kitabê ci ma kenê roşin. Amacê projeyê Konfederalîzmê Demokratîkî azadîya şaranê Rojakewtena mîyanêne yo.”

CPT GUREYÊ XO NÊKENO

Ocalane qiseykerdişê xo bi nê vatişan qedênayî: “Embaze Leyla vat ke ‘şima nêeşkenê rayberê şarêk ser o polîtîkayêka winayêne bica biyarê.’ Ma mucadeleyê embaze Leyla rê hurmet ramojnenê. CPT zî vano ke îşkence çinyo, no tecrîd nêyo. Na sazî gureyê xo nêkena. 6 mîlyonî merdiman vat ke ‘Serek Apo îradeyê ma yo.’ Azadîya serek Apoyî azadîya ma ya.”