Grevê vêşanîye yo bêdem-bêagêrayîş ê bajarê Strasbourgî yê Fransa 140 rojî yo dewam keno. Hendî fikarê problemanê giranan û mendeyan ê weşîye yê çalakwanan esto. Çalakwanî vanê xoverdayîşo bêhempa yê mayanê tepişteyan ê Kurdistan û Tirkîya hêz dano înan. Veng yeno dayene ke vengê mayan bêro xurtkerdene.

‘Ne Ma bê Domananê Xo Benê, Ne zî Ê bê Rayberê Xo Benê’

14 xoverdayoxanê Strasbourgî ra yew zî Ramazan Îmîr o. Maya Îmîrî Qadrîye veng da ke wa mayê tepişteyan ê ke seba wayîrvejîyayîşê domananê xo xover danê, tena nêrê verdayene. Maye Qadrîye vat ke ganî paştdayîş tena bi Kurdanê Ewropa bisînor memano û ancax bi xoverdayîşê pîyayî serkewtiş beno.

‘Bi Keye de Roniştişî Ma Nêeşkenê Bi ser Bikewê’

Cinîya Yuksel Koçî Gulê Koçe zî vat, “Ma çende bieşkê vengê xo berz kerê, ma do hende bi ser bikewê. Koçe zî bale ante serê muhîmîya çalakîyanê seba paştdayîşê xoverdayîşî û vat, “Bi keye de roniştişî ma nêeşkenê bi ser bikewê. Ez welatanê Ewropa şermezar kena, ê demokrasîyî tena çarçewaya menfaatanê xo de pawenê.”

Xoverdayoxanê grevê vêşanîye yê Strasbourgî 17’ê Kanûne 2018 ra nata dest bi çalakîya xo kerdbi. Nameyê xoverdayoxan nê yê: Gulîstan Îke, Nûrgul Başarane, Dîlek Ocalane, Mûstafa Sarikaya, Yuksel Koç, Mehmet Nîmet Sevîm, Denîz Surgut, Agît Ûral, Mohamed Ghaderî, Ekrem Yapici, Ayvaz Ece, Kerem Solhan û Kardo Bokanî.