Weçînayîşanê 31ê adare de qezaya Curnê Reşî yê Riha de namzedê DEM Partî ser kewtbî. La îtîrazê AKPyî ser o bire dîyaye de qeza de 2yê hezîrane de newe ra weçînayîş bêro kerdene.

Şaredarê Curnê Reşî Garîp Yeşîlî derheqê babete de ANFyî rê qisey kerd.

Yeşîlî vist vîrî ke Curnê Reşî seba tarîxê têkoşînê kurdan cayêko girîng o û vat: ''Tîya seva ferasetê şaredarîye yê kurdan wayîrê cayê giranî yo. 45 serran ra pey Curnê Reşî de serkewtiş yeno a mana ke şarê ma ferasetê verênî ra qefilîyayo. 45 serrî verî zî tîya de seba ke verê têkoşînê azadîye bêro girewtene zaf kayî ameybî kaykerdene. Nika Curnê Reşî de gamê feodalîzmî yê peyênî est ê. La AKP nêwazeno ke feodalîzm biqedo. Coka nêwazeno tîya destê ci ra şoro.

45 serran ra pey Curnê Reşî ancî rayê xo dayî ma.Ewro ma nêeşkenê sîstemê heq û edaletî ra behs bikerê. Wan zî nimûneya ney a. Seba îqtîdarî girîng nîyo ke ma tîya de çend rayî girewtê. AKP senî biwazo proseso huqûqî o qayde aver şino. Vera nê bêhuqûqîyan şarê ma ancax bi wayîrvejîyayîşê îradeyê xo eşkeno têkoşîn bikero.''

Garîp Yeşîlî dîyar kerd ke naye ra pey zî ê do xoverdayîşê xo rê dewam bikerê û îradeyê şarî teslîm nêkerê. Yeşîlî cat: ''Xelfetî zî sey Curnê Reşî girîng a. Xelfetî erdê Birêz Ocalanî yo coka seba kurdan girîng o. AKP zî ney hol zaneno. Ma pê bawer ê ke bi îradeyê xo yê xurtî newe ra Curnê Reşî bigêrê. Naye ra pey zî ma do fek vera nêdê û xo ver bidê. Ma do wayîrê îradeyê şarê xo vejîyê.''