Nê prosesê weçînayîşan de îqtîdarê AKP-MHPyî vera rojnameger, hunermend û sîyasetmedaranê kurdan operasyonê qirkerdişê sîyasîyî zêdînayî. Tewr peyên hewteyê vîyarteyî de 50 kesî tepişîyabî.

Hemserekê Kongreya Komelê Demokratîkî (KCD) Berdan Ozturkî derheqê operasyonan de ANFyî rê qisey kerd. 

Ozturkî îfade kerd ke çimê her kesî 14ê gulane de yo û operasyonanê destbendkerdiş û tepiştişî hêrsê şarî zêdînayo. Ozturkî vat: ''Îqtîdar keno ke pê nê operasyonan şarî bitersno, bêmoral bikero. La ma do 14ê gulane de înan rê operasyonê tewr pîlî bikerê. Ma do kokê înan bîyarê. Nê operasyon û hêrişî mojnenê ke îqtîdar dişmenîya vera kurdan de israr keno. La nê polîtîkayê ci şaş ê. Îqtîdarî 8 serran operasyonê winayênî kerdî la pê nînan netîceyêke nêgirewte. Hînî çîyêk nêeşkeno îqtîdarî bixelisno. Nê rojî rojê ci yê peyên ê.''

Ozturkî bale ante ser ke muxalefet vera nê hêrişanê serê kurdan bêveng o û vat: ''Muxalefet ganî bi krîteranê xo têbigêro. Muxalafet qala huqûq û edaletî keno la huqûq ho yeno binpaykerdene. Na bêvengîye samîmîyetê muxalefetî mojnena. Sey KCDyî ma vanê ke eke na bêvengîye û bêtewirîye dewam bikerê meseleyê nikayênî zî do bibê giranêr. Nê atmosferî de şer û dişmenîya vera kurdan bîyê giranêr. Eke şima qala xelisnayîşî kenê ganî şima mesuldarîyanê xo bîyarê ca.''