Şar kuçeyan de qîreno: Ma nêeşkenê debara xo bikerê

Amed, Dêrsim, Îstanbul û Mersin de şaro ke vejîya kuçeyan veng da hukmatî ke wa îstîfa bikero. Polîsan hêrişê kerd û xeylêk kesî destbend kerdî. Bado ke çalakîyî vila bîyî Îstanbul de bi qerarê qaymeqamîye çalakîyî ameyî qedexekerdene.

Vakurê Kurdîstan û Tirkîya de  çalakîyanê ke badê dîyarşîyayîşê dovîzî dest pêkerd, vila benê.  Çalakîyanê ''Ma nêeşkenê debara xo bikerê'' veng dîyeno Erdogan û îqtîdarî ke wa îstîfa bikerê.

Îstanbul de hetê Hêzanê Kede, Haştîye  û Demokrasîyî ra xeylêk semtan de çalakîye ameye organîzekerdene.  Çalakîya ke Kadikoy de ameye kerdene de polîsan hêriş kerd û xeylêk kesî destbend kerdî. Avcilar de zî şaro ke vera îqtîdarî vejîya kuçeyan hetê polîsan ra gerîya binê ablûqa û polîsan da eşnawitene ke bi qerarê qaymeqamîye çalakîyî ameyî qedexekerdene. Bakirkoy de zî şar bi slogana ''şima nêeşkenê îdare bikerê, îstîfa bikerê'' vejîya kuçeyan. Tîya zî çalakîye bi qerarê qaymeqamîye ameye qedexekerdene. Hemwelatîyan bi tencik û tewayan qerarê qedexeyî protesto kerd. Polîsan hêrişê şarî kerd û kesêk destbend kerd. Beylikduzu de zî şaro ke vejîya kuçeyan polîsan verê înan girewt û vat sey hewteyêkî çalakî û aktîvîteyî ameyî qedexekerdene. Polîsan bê hîşyarkerdişî hêriş kerd û nizdê des kesan destbend kerdî.

Medydanê Dagkapiyî yê Amedî de hetê Platformê Kede û Demokrasîyî ra çalakîye ameye kerdene. Vervatoxê Platformî Mehmet Ceylanî ke çalakîye de qisey kerd bale ante polîtîkaya hukmatî ser û vat wextê nê îqtîdarî de feqîrî dahîna bi feqîr û zengînî dahînî bîyî zengîn. Ceylanî vist vîrî her roje her çî vay beno, fatûrayî dilab-hîrlab zêdîyenî û vat: ''Heman wextî de bêkarîye zêdîyena. Şarî hinî vera na neheqîye bêveng nêmaneno, wayîrê heqanê xo vejîyeno. Ma edalet wazenê. Wa her kes bieşko heqê keda xo bîgiro.''

Dêrsim de zî Platformê Kede û Demokrasîyî bi eşkerayîyêke bale ante tengayîya ke şar anceno ser û vat hinî bes o, ganî xoverdayîş bêro pîlkerdene ke wa neheqîye biqedîyo.

Mersin de zî bi eynî waştişî şar kuçeyan de bi. Çalakîya ke partîyê sey HDP, TÎP û TOPî tewrê ci bîyî de pankartê sey ''hinî beso ma nêeşkenê debara xo bikerê'', ''şima do bêrê muhakemekerdene'' ameyî akerdene û sloganê sey ''hukmat îstîfa'', ''AKP do hesab bido şarî'' ameyî eştene. Polîsan hêrişî şarî kerd û bi derbkerdişî hîrê kesî destbend kerdî.