Prosesê vîrusê Korona de zîndana ser o xeylêk nîqaşî ameyî kerdene. Bi qanûnê înfazî beşêkê tepişteyan vera dîya la tepişteyê sîyasîyî teberê qanûnî de mendî. Zîndanan de ke cara tede binpaykerdişê heqanê merdiman zêdêr ê, 17ê hezîrane ra nata nêzanîyeno ke çend kesî pê vîrusî kewtî. 3 mengî yo ke Wezaretê Edaletî derheqê nêweşîye de zanayîşêk nêda. Hetê bînî ra bi bahaneya janî destûr nêno dayene ke mengêke de rayêke ra zêdêr tepişteyî pêvînayîş bikerê.

Komîsyonê Zîndanan ê OHDyî ra Avûkat Bariş Marhanî derheqê mesele de ANFyî reyde qisey kerd. Marhanî da zanayene ke vîrusî ra pêvînayîşê têrîyî ameyî taloqkerdene, avukatî nêeşkenê muwekîlanê xo reyde pêvînayîş bikerê, tepişteyê nêweşî nêwedarîyenê nêweşxaneyan û pêvînayîşî mengêke de rayêke peyê camî ra yenê kerdene.

Marhanî eşkera kerd ke nê kerdişî pêro tecrîdo keyfî yo.  Marhanî vat: ''Rixmo ke menga hezîrane de gamê normalîzebîyayîşî îlan bîyî zîndanan de rewşe nêvurîyaye. Kitab, mektub, kovarî nêdîyenê tepişteyan. Bi bahaneya pandemî tepişteyî dinya ra yenê îzolekerdene. Ma nêzanenê ke zîndanan de çend kesî pê vîrusî kewtî. Zîndanan de şertê weşîye nênê caardene û tepişteyî nêwedarîyenê nêweşxane.  Ma pê qerqilîyenê ke nê kerdişî pêro nê prosesî ra dima zî do mende bibê.''