Xoverrodayîşê grevê vêşanîye yê ke vera tecrîdkerdişê Rayberê Şarê Kurdî Abdullah Ocalanî rayberîya hemsereka KCD'yî û parlamentera HDP'yî ya Colemêrgî Leyla Guvene de dest pêkerd, wextêko kilm de hepisxaneyan û çar kuncikanê dinyaye ra vila bîyî. Hepisxaneyê Tîpê F’yî yê Hûmara 1’ine ya Kandira yê Kocaelî de Nejla Atake, Ûmût Çamlibel, Îbrahîm Kaya, Yûsûf Başaran, Ridvan Guven û Guven Sûvarîogûllari 16'ê Kanûne ra nat, Sebahat Tuncele û Selma Irmake zî 16'ê Çeleyî ra nat grevê vêşanîye de yê.

Guven Suvarîogullari bi nameyê girewteyanê grevê vêşanîye de yê serê amancê çalakîya xo de  mektubêk şawite û nê pare kerdî:

“Seke yeno zanayene neteweya ma prosesêko giran ra derbaz bena. 4-5 serrê verê ma zor û zehmet ê. La ganî ma her wareyî de xo goreyê nê amade bikerê. Ma êdî waştişê azadîya şarê xo tecîdar bikerê. Serra neweye ma statuyê şarê xo qetî bikerê. Seba naye zî bedelê xo çi beno wa bibo ma amade yê bidê. Ganî ma bi nê amancî nêzdîyê nê demî bibê. Ma zanê ke kes azadîye nêdano kesî, merdim eke têkoşîn bikero qezenc keno.“

Mektube de ame vîrardene ke bi slogana  ‘Tecrîdê bişiknê, faşîzmî birijnê û Kurdistanî azad bike’ înan dest bi xoverrodayîşêko gird ê azadîye kerdo û ame vatene ke “Ma bi na bawerî û qerardarî dest bi serra neweye kerd. Bêguman bi xoverrodayîşî zaf  heqîqetî vejîyayî meydan. No xoverrodayîşêko bi rayberîya cinîyan de seba Rayberîye dest pêkerdo, serkewtiş qetî yo.”

Mektube de ame vîrardene ke heta tecrîdkerdişê Rayberê Şarê Kurdî Abdullah Ocalanî bêro wedaritene  xoverrodayîşê înan do bêro domnayene û ame vatene ke “Seba serkewtişî ma wayîrê mîrasêkê 46 serran ê. Na rastîye seba serkewtişî bes a.” Peynîye de heme xoverrodayoxê grevê vêşanîye û şaro welatperwer ame silamkerdene.