Dayîka xoverdayox Şahîn Tanî,  Behîye Tane bale ante grevê vêşanîye ser û waşt ke tecrîdê serê Rayberê Şarê Kurdî Abdullah Ocalanî bêro wedartene.

Xoverdayoxanê Zîndanî ra yew zî Şahîn Tan o. Tano ke Zîndanê Ceyhanî de yeno tepiştene û 26’ê Kanûn a 2018’î ra grevê vêşanîye de yo, gama ke 17 serre bi rîyê tewrbîyayîşê şayîya Newroze ya qedexeyî ra ameyo tepiştene û  3 serrî û nêm o  zîndan de yo.

Dayîka Tanî, Behîye Tane derheqê lajê xo de nê pare kerdî: ‘‘Şahîn çar lajanê mi ra tewr qij o. Xebatanê ciwanîye de ca girewtêne. Serra 2016’î de pîrozkerdişê Newroza ke Ceyhan de qedexebi tewrê ci bi, ame destbendkerdene û tewqîfê ey ame birnayene.  Nika serrêk menda ke serbest bêro verdayene û grevê vêşanîye de yo. O çend vajo ez hol a zî, kîloyê ke dayî û awirê çimanê ey  rewşa ci ya xirabe ramojnenê. Telefon de nefesê ci peyseno, nêeşkeno qisey bikero. Xora çend xirab bi zî mi ra nêvano. Çi heqê dewlete esto ke wina yew dejî bi ma bido ciwîyayene? Ma sey keyeyê tepişteyan wazenê ke no tecrîd cade bêro wedartene û qijê ma weş bî. Xora eke grevê vêşanîye wina dewam bikerê, xesarê ke do merê çarekerdene bêrê ciwîyayene. Ganî şarê Kurdî vengêko berz vejo û vernîya qewimîyayîşanê xiraban bîgero. Zerrîya ma dayîkan cîya vêşena. Ma zî qijanê xo ya pîya grevê vêşanîye de yê. Ê nêwenê, ma senî eşkenê biwerê. Hema ke yewna xebera mergî nêameya, vengê înan bieşnawê.‘‘