Mamostayê endamê Sendîkaya Perwerde û Zanîstî ya Almanî (GEW) şîyî serdana grevê vêşanîye yê bêdem û bêagêrayîşî yo ke Strasboûrg de dewam keno, paştdayîş da çalakîye.

Mamostayê sendîkaya GEW’î ya bajaranê Frankfûrt, Munîh û Oldenbûrgî yê Almanya, hemserekê Kongreya Cimatê Demokratîkî ya Kurdan a Ewropa (KCDK-E) Yuksel Koçî de ameyî têhet. Heyetê sendîkaya Almanî de Elman de Margote, Sîmoneît, Bîrgît Zwîekîrsch, Chrîstîan Katz û Heînrîch Becker ca girewt.

Serdane de mektuba mamostayê berpirsîyarî yê projeyê wendegehî yê ke wazenê Kobanî de wendegehêk bivirazê, hetê mamostayanê Almanî ra Koçî rê ameye pêşkêşkerdene.

Serdane de Bîrgît Zwîekîrsch qisey kerd û  ard ziwan ke hem seba paştdayîşî û hem zî seba  sendîkayê ke binê serbanê înan de yê zanayîşan ci de yê, ameyî serdane.

Hemserekê KCDK-E’yî Yuksel Koçî zî ard ziwan ke tecrîdê serê Rayberê Şarê Kurdî eynî wext de tecrîdê serê heme Kurdan o, tecrîdê serê demokrasî û têduştîye yo. Koçî ard vîrî ke serra 2015 ra nata bi girankerdişê tecrîdî reyde bajaranê Kurdan de qirkerdişê girdî ameyî kerdene.

Koçî destnîşan kerd ke têkoşîn seba demokrasî û têduştîye yo, paştdayîşê pawitoxanê heqanê merdiman û Almanya seba înan muhîm o. Koçî vengdayîş hukmatê Almanî rê kerd ke ganî herinda paştî dayîşê polîtîkayanê şer ê Tirkîya ganî seba haştî û demokrasî bibê wayîrê tewirî.

Serdane de mamostanê sendîkaye ANF’yî rê qisey kerd.

Margot Sîmoneîte: Ganî Almanya fek nê kerdişanê xo yê ke PKK’yî sey rêxistinêka terorîste namekerdişî ra raverdo. Ganî êdî bi rayîrê Rêxistina Pawitişê Qanûnê bingeyênî (BfW) teqîpkerdişî caverdo. Ma seba ke paştdayîş  bidê çalakîya grevê vêşanîye tîya yê. Ganî ma dest bi têgêrayîşî yo ke verê na hemparîya hukmatê Almanî û Tirkîya gêno bikerê.

Chrîstîan Katz: Ganî hêzê demokratîkî bibê yew û rayîyêkê pêroyîyî awan bikerê. Rojawan de wexto ke ma cinîyêk ra persayî “Ti çi wazena bêro kerdene” vatebî, “Rotişê çekan ê seba Tirkîya bidê vindernayene.” Na nuqtayêka muhîm a. Nuqtaya bîne zî hêzê demokratîkî bibê yew û zextê hukmatê Almanya bikerê, ke Tirkîya de wareyê demokratîkbîyayîşî de game bierzê. Hêvî kena ke nê zextî gird benê, Yukselî reyde cuya 13 kesan hîna zêde nêkewena tehlûke.

Heînrîch Becker: Rayberîya Hessenî paştdayîş dana çalakîyanê vera tecrîdê serê Ocalanî û heme girewteyanê bînan. Ez zî paştdayîş dana  waştişê hemgureyanê xo.