Ewropa de tecrîdo girankerde yo ke Rayberê Şarê Kurdî Abdullah Ocalanî ser o yeno domnayene, yeno protestokerdene. Hamburg û Marsîlya de grevê vêşanîye dewam kenî û Hannover de çalakîyêk ameye viraştene.
Bajarê Marsîlya yê Fransa de û bajaranê Hannover û Hamburgî yê Almanya de çalakîyê ke hemverê tecrîdê serê Ocalanî de yenî viraştene, dewam kenî.
MARSÎLYA
Bajarê Marsîlya yê Fransa de çalakîya grevê vêşanîye hetê grûba çarine ra ameye dewrgirewtene. Çalakîya ke verê Walîtîye de bi ronayîşê xeyman ameye destpêkerdene, ci rê zaf eleqedarîya çapemenîya cayîye esta.
HANNOVER
Bajarê Hannoverî yê Almanya de zî seba baleantişê tecrîdê Îmrali û çalakîya Leyla Guvene, verê îstasyona trênan de xeymeyî ameyî ronayene û vilawekî ameyî vilakerdene.
Çalakîya ke bi şîarê waştişê Leyla Guvene waştişê şarê kurdî yo ameyî viraştene de şarê kurdî ra ame waştene ke wa rayberê xo rê wayîr bivejîyê.
HAMBURG
Bajarê Hamburgî de zî çalakîya grevê vêşanîye hetê grûba hîrine ra dewr ameye girewtene. Çalakîye rê her roje paştîdayîş zêdîyeno.
Çalakwanan ra temsîlkarê AGIFyî yê Hamburgî Huseyîn Pamukî vat ke tecrîd sûcê merdimîye yo, coka ê kewtî girevê vêşanîye.
Senarîst Oner Çakar, hunermendê sînema Bîlal Bulut, hemserekê NAV-DEMî Tahîr Koçerî zî çalakwanê grevê vêşanîye zîyaret kerdî û mesajê paştîdayîşî dayî.
Çalakwanê ke grevê vêşanîye de yê her roje mabênê saetanê 16.00 û 17.00 de kuçeyanê tewr qelebalixan ê bajarî ra Monckebergî de stand akenî û derheqê felsefeya Ocalanî, tecrîd û grevê vêşanîye yê Leyla Guvene de zanayîş danê.
