Delegasyonê Vera Tecrîdî yo Mîyanneteweyî Tirkîya de zîyaretanê xo rê dewam keno. Delegasyon Îstanbul de, roja şemetî  Otêla Hillî ya Taksimî de forumêk do bikero. Endama Delegasyonî û aktîvîsta anarşîste Paula Martin forumî ra verî ANFyî rê qisey kerd.

Martina ke Barselona ra ameya Îstanbulî, derheqê zîyaretanê delegasyonî de vat: ''Seba ke ez destek bida têkoşînê kurdan, beşdara nê heyetî bîya. Tecrîdê Îmraliyî yew îşkence yo û no tecrîd hem vera şarê kurdî hem zî vera pêor şorişgêran yeno kerdene. Tecrîd de bara Ewropa zî zaf zêde ya. Tecrîdê Îmraliyî seba cezakerdişê kurdan yew metod o.''

Martine îfade kerd ke Rayberê Şarê Kurdî Abdullah Ocalanî seba azadîya şaran modelêko alternatîf awan kerdo. Martine da zanayene ke ê amadekarîye kenê ke derheqê zîyaretanê xo de raporêk amade bikerê. Martine vat: ''Sere de Îmrali, rewşa zîndananê Tirkîya xirab a û faşîzm tede geş bîya. La tecrîd do bi têkoşîn û paştdayîşî bêro şiknayene.''