Grevê vêşanîye yê seba wedaritişê tecrîdê serê Rayberê Şarê Kurdî Abdullah Ocalanî yenê kerdene vila benê. Keyeyanê tepişteyan ra zî seba çalakîyanê grevê vêşanîye yê ke bi serkêşîya hemsereka KCD’yî dest pêkerdîbî paştdarîye dîyena. Keyeyî anê ziwan ke çalakîya ke hetê domananê înan ra yena kerdene bica ya, ganî mesuldarî tavilî gaman bierzê.

Merdima tepişteyan Meryem Erbeye (65) yak e 3 domanê ci zî zîndananê cîyayan de grevê vêşanîye de yê ard ziwan ke domananê aye ra Mehmet Erbey 26’ê Kanûne ra nata Zîndanê Tîpê T’yî yê Duzce de, keynaya ci Maşallah Erbeye 5’ê Çele ra nata Zîndanê Girewteyî yê Cinîyan ê Bunyanî yê Kayserî de û tewr peynî zî lajê aye yo 22 serre Serhat Erbey zî zîndanê Denîzlî de grevê vêşanîye de yo. 

DIMAYO KE DEWA ÎNAN AMÎ VÊŞNAYENE KOÇÊ MERSÎNÎ KERD

Serra 1986 de dimayo ke dewa înan amî vêşnayene keyeyê Erbeyî koçê Mersînî kerd û seba înan prosesêkê hîna zehmetî dest pêkerd. Netîceyê zextan de dimayo ke keyeyî ra 3 kesî pêdima vejîyayî ko keye hetê dewlete ra tam hedefe gîrîya. Maşallahe (40) ke 4 domananê ke pey ra mendê tewr pîlê înan a, xebatanê ciwanî û cinîyan de bi hawayêkê aktîfî ca girewtêne.

Maşallaha ke cezaya ci ya 10 serrî esta û 5’ê Çele ra nata grevê vêşanîye de ya, zîndanê Kayserî de xoverdayîşê xo domnena. Erbeye ard ziwan ke keynaya ci nêheqîyî qebûl nêkerdî û naye ra dewrêkê bihêrsî yê ciwanîye ravêrt û vat “Keynaya mi vatêne rixmê her çîyî de rojêk do no zulm biqedîyo û ma do agêrê erdanê xo. Hewna zî cilanê herêmkîyan ke înan ra zaf hes kena dana xo ra û xeyal kena ke ma do zozananê Kurdistanî de bigêrê.”   

 ‘HENDÎ TU ÇÎYÊK SEY VERÎ NÊYO’

Mehmeto (33) ke Maşallahe ra qijêr o bi hişmendîya welatperwerîye ya keyeyî sey waya xo bi hawayêkê aktîfî kewt xebatanê ciwanîye mîyan. Naye ra ame girewtene û ci rê 23 serrî ceza dîyaye. Mehmet 26’ê Kanûne ra nata grevê vêşanîye de yo. Dimayo ke xebera şehadetê birayê ci şina no serê ê de zaf tesîr keno. Maye Erbeye vat, “Mehmet weranê mi ra zaf hes keno. Na çalakîye seba kesanê ke werî ra hes kenê hîna zor a. La hendî tu çîyêk sey verî nêyo.”

Erbeye vat zextî serê keyeyî ra qe nêbîyî kemî, zextê serê lajê aye Velatî zî bîbî vêşî û vat, “Seke dore amîbî ê. Yan do hemverê zextan de bivejîyayêne ko, yan do bikewtêne zîndan û înan ê rê cezaya heta bi hetayî bidayêne. Ma çare şirawtişê êyê teberê welatî de dî.” Tewr qijê keyeyî Serhatî zî qedera înan ê bînan ra para xo girewte. Rîyê parekerdişanê xo yê medyaya sosyale ra û çalakîyanê ke tewrê înan bîyo ra 5 serrî ceza dîyaye ê, Serhat Denîzlî de grevê vêşanîye domnenoç   

MI LAJANÊ XO RÊ XOVERDAYÎŞ Û ÇOKNÊRONAYÎŞ MÛSNA

Erbeye vat, “7 domananê mi ra 3’ê înan vejîyayî ko, ê yewî xebera şehadetî amî. 3’ê înan zî kewtî zîndan. Lajêk min o ke mi dest de mend zî rîyê zextan ra mecbûr mend ke biremo Swîsre. Dewlete fek ma ra vera nêda, ma rê asanîyêk nêdaye. Hewte de tewr tay reyêk yenê verê berî û tacîzê ma kenê. Tim domananê mi yê ke ko de yê persenê mi ra. Ez zî înan ra vana ‘eke şima zanê ça yê mi berê verê înan.’ Keye de ez û mêrdeyê xo mendî. Xêrcê di kokiman çew nêmend. Dewlete ma rê sewbîna rayîr nêverda.

Ez ewro nê halê xo rê şukur kena. Ez bi domananê xo yê her şertî de hende xasek xover danê serberz a.” Erbeye qiseykerdişê xo wina qedîna: “Heta ma Kurdî nê halî de bê do domanê ma zî xoverdayîşê xo bidomnê, ez do zî sey maya înan tim paştî bidî înan.”