Komeleya Huqûqnasan a Seba Azadîye (OHD) û Komeleya Paştdayîşê Keyeyanê Tepişteyan raporo ke derheqê binpaykerdişê heqan ê zîndanan de ame amadekerdene rayapêroyîye reyde pare kerd.

Kombîyayîşo ke Şubeyê OHDyî yê Amedî de ame kerdene merdimê tepişteyan, endamê Meclîsê Mayanê Haştîye, Îdarekarê OHD û HDPyê yê bajarî tewrê ci bîyî.

Eşkerayîye de bale ameye antene zehmetîyanê ke tepişteyê ancene ser û ame vengdayene wa na neheqîye bêro qedînayene. Reyna grevê vêşanîye ke menge hîrêne de yo ame vîrardene û ame vatene ke ganî cade waştişê heqedarî yê tepişteyan bîyerê ca.

Eşkerayîye de Wezîrîya Edaletî rê ame vengdayene û nê waştişî ameyî rêzkerdene:

 Wa tepişteyê nêweşî cade bêrê dermankerdene û tehlîyekerdene.

Wa nêzdîbîyayîşo xirab yê vera tepişteyan bêro caverdayene.

Wa cayanê mahreman de kamerayî bêrê wedaritene.

Wa wezîfedarê ke zextê tepişteyan kenê bêrê hukmkerdene.

W a malzemeyê pakîye bêrê dayene.

Wa warê atkvîteyanê kultur û komelkî bêrê afernayene.

Wa heyetêk zîndan de cigêrayîş bikero.

Wa tepişteyê ke înfazê înan ameyî vêşnayene bêrê veradayene.

Kombîyayîş de dayanê laçiksipîyan ra Yesure Tufan ard ziwan ke ê rîyê grevê vêşanîye ra şewe nêkewenê ra. Tufane vat: ''Ma mayî, zerrîya ma vêşena. Ma tersenê ke qicanê ma ra xeberêka xirabe bêro. Problemê weşîyê yê tepişteyan estê û ê kewnê grevê vêşanîye. Qicê ma ûca mirênê. Wa dezgehê komelê sîvîlî,  kurdê her hetê dinya wirzê payan ser, paştî bidê ma. Wa mayî hînî mebermê. Xora ma zaf qicê xo kerdî binê herre, hînî bes o. Ma efuya pêroyîye wazenê. Nêweşê giranî zîndanan de yê. Ma nêwazenê wa çew/e bimiro.  Ma veng danê mayanê tirkan; paştî bidê ma. Ma qicê ma memirê.''