Turo diyîn ê weçînayîşê serekkomarîye yê Tirkîya 28ê gulane de yo. Endamanê Înîsîyatîfê Mayanê Haştîye yê Wanî bi rayîrê ajansê ma venga kurdan û pêro kesan da ke seba ke zulmê vera kurdan biqedo, merdimî nêkişîyê, seba haştî û edaletî 28ê gulane de raya xo bidê.

Dayîke Zekerîya Kaya vat: ''Kamcayê dinya de benê wa bibê şorê raya xo bidê. Ma sey Mayanê Haştîye vanê ke raya xo bidê wijdanê xo. Ma şer nêwazenê; edalet, haştîye, azadîye, wayûbiratîye û 'Jin, Jiyan, Azadî' wazenê. Ma venga şarê ma yê Ewropa danê ke şoro sindoqan ser. Seba haştîye wa her kes têbigêro. Dejê dadîyan yew o.'' 

Dayîke Asya Ozlu vat: ''Wa her kes şoro sindoqan ser û wayîrê sindoqan vejîyo. Ma hînî wazenê ke haştîye bêra welatî. Wa hînî gonîye nêrijîya, kes nêkişîyo. Seba ney şorê sindoqan ser. No weçînayîş zaf girîng o, naye ra wa her kes raya xo bido.'' 

Dayîke Besna Aydogan vat: ''Wa pêro mayî û cinîyî wurzê payan ser, seba raydayîşî ê bînan îqna bikerê. Seba ke reyna cigêrê ma nêvêşo wa her kes raya xo bido. Vera kurdan zulm û fermanê kiştişî est o. Seba peynîya nînan bêra wa her kes şoro sindoqan ser. Bi taybetî wa şarê ma yê Ewropa şoro sindoqan ser.''