Weşanxaneyê Mezopotamya û Mîr Muzîk 1ê sibata 2019î de bi bira Wezîrîya Karanê Zereyî ya Almanya û bi bahaneya qedexeyê vera PKKyî ameyî qedexekerdene. 

Roniştişê dewaya vera qedexeyî vizêr Mehkemeya Îdarî ya Federale ya Leipzigî de ame kerdene. Heyetê mehkeme ganî saete 17.00 de bire eşkera bikerdêne la bire bii hawayêkê fekkî şewe hetê avûkatan ra ameye parekerdene.

Goreyê bire mehkeme qedexeyê Wezîrîye 'goreyê qanûnan' dîyo. La roniştiş de nîqaşê mabênê avûkatanê dezgehan û avûkatanê wezîrîye de pêro argumanê wezîrîye ameyî redkerdene.

Goreyê agahîyanê ke avûkatan dayê nê ercnayîş û îdîayî bira mehkeme de estê:

''Xora xebate kultur û muzîkî yê kurdkî çarçewa azadîya fikran de yê, qanûnanê Almanya no tesdîq kerd. La xebatê Weşancaneyê Mezopotamya û Mîr Muzîkî nêzdîyê hetê rêxistinêka qedexekerde ra yenê îdarekerdene û hetê rêxistine ra yenê fînansekerdene.

Wina pawîyeno ke Mehkemeya Îdarî bira xo bi nuştekî zî eşkera bikera.

Avûkatanê dezgehane kurdan ra Lucas Theuneyî ANFyî rê qisey kerd û pare kerd ke heyetê mehkeme binê tedayanê sîyasîyan de yo û vat: ''Dima ke bira mehkeme biresa destê ma, ma do îtîraz bikerê û nê prosesî berê Mehkemeya Qanûnê Bingeyî ya Federale. Paştdayîşê mehkeme yê bi nê qedexeyî ecêb o. Tîya de babete xebatê kultur û hunerê kurdan o. Ma do têkoşînê xo yê huqûqî rê dewam bikerê. Dima ke pêro rayîrê huqûqî yê Almanya bêrê qefilnayene ma do soz bidê Mehkemeya Heqanê Merdiman a Ewropa.''