Wezaretê Karanê Zereyî 1ê sibata 2019î de Weşanxaneyê Mezopotamya û Mîr Muzîkî qedexe kerdbî. Wezaretî qedexeyê vera PKKyî seba ney qedexe sey bahane mojnabi.

Weşanxaneyê Mezopotamya û Mîr Muzîk vera qedexeyî hîrê serrî yo têkoşînê huqûqî kenê. Wird dezgehan zî muracatê Mehkemeya Îdare ya Federale kerd ke mehkemeya tewr berze ya Almanya ya.

Mehkeme muracat qebul kerd û ewro nîqaşî bikera ke gelo bira Wezaretî goreyê huqûqî ya yan nê. Wird dezgehan waşt ke kitab, CD û arşîvê muzîkî yê ke dest nîyabî ser wa apey bêrê dayene. Mehkeme do nê waştişî ser o vinderê.

Serê sibayî ra nata şaristanê Liepzigî de roniştişê mehkeme dewam keno. Şarê kurdî û dostê înan seba paştdayîşê wird dezgehan verê mehkeme de çalakîyêke kerde.

Hozan Şemdîn, Hozan Aydin, Hozan Seyîdxan, Cewad Merwanî, Peywan Arjîn, Hozan Ozgur Riha, Hetkarê Hemserekîya CÎKî Mele Dawûd, Hemserekê FED-KURDî Kerem Gok zî tede çalakîkeran venga dezgehanê muhakemekerdişî yê Almanya da ke wa na bira bêhuqûqe sereraşt bikerê.

Heta ke bire bêra dayene şarê kurdî û dostê înan verê mehkeme de bibê. Wina pawîyeno ke mehkeme mîyanê roje de bira xo do bida.