Sîyasetmedaro kurd û Mehmet Çakas serrêke ra nata bajarê Hannoverî yê Almanya de tepişte yo. Mehmet Çakaso ke Çewlîgî ra yo xebatanê xo yê sîyasîyan ra bi waştişê Almanya Îtalya de kanûna 2022yî de  tepişîyabi û dima adara 2023yî de  teslîmê Almanya amebi kerdene. Mehmet Çakas êlula 2023yî ra nata Celle de madeyê 129/byî ra yeno muhakemekerdene. Ewro roniştişê peyênî de qerar ame eşkerakerdene.

Mehkemeya Herême ya Berze ya Celle cezaya ewro  bi sûcdarîya endamîya Partîya Karkeran (PKK) 2 serran û 10 aşman daye Mehmet Çakasî. Mehmet Çakas bi îdîaya 2019î ra heta mabênê 2021yî Bremen de sey kadroyê PKKyî xebityayîşî ame sûcdarkerdene.

Dozgerîye cezaya 3 serran û 8 aşman waşte. Avûkatanê Mehmet Çakasî Dr. Björn Elberling û Ulrich von Klinggräff hewteyo ravîyarte de beraatê muwekîlê xo waşt û heme sûcdarîye ke bîlasebeb vera Çakasî ameyî kerdene, betal kerdî.  Mehmet Çakasî zî qala xo ya peyên a mehkeme de vat o bi xo nîno muhakemekerdene eslê xo de têgêrayîşê kurdan yeno muhakemekerdene.

Merdim û hemrayê Çakasî ke semedê paştdayîşî tewrê mehkeme bîyî, bi çapikan û tîlîlîyanê xo xoverdayîşê Çakasî selam ker.

Avûkatê Çakasî Dr. Björn Elberlingî badê roniştişî ard ziwan ke çîyê ke muwekîlê înan pê yeno sûcdarkerdene kanitê ci çîn ê û vat ê do vera nê qerarî îtîraz bikerê.

Fonê Hetkarîya Edlîyî AZADÎ vist vîrî ke ye aşme de kurdî hetê mehkemayanê Almanya ra sey endamê PKKyî ameyî tepiştene û vat Almanya bin ê kerdişanê xo paştî danê rejîmê Erdoganî û verê çareserkerdişê meseleya kurdan gena. Mas ey Azadî reyna wanzenê ke wa no qedexe PKKyî bêro wedaritene ke wa problemê Vakurê Kurdîstanî û Tirkîya bêrê çareserkerdene.

Verê qerarî verê mehkeme de mîtîngê paştdayîşî amekerdene. Qiseykerdişan de bale ameye antene polîtîkaya krîmînalîzekerdişî ya Almanya ya vera kurdan ser ame vengdayene ke wa na polîtîka bêro caverdayene.

Birayê Mehmet Çakasî zî vat: ''Wextêk Ewropa de şar tersê DAÎŞÎ ra nêaftayêne keyeyê xo ra vejîyo teber. Qijanê kurdan ê tewr erjîyayeyan ganê xo feda kerd û dinya DAÎŞî ra xelisnaye û ewro zî herinda ke kurdan rê minetdar bê yenê ma sûcdar kenê.''