Sey xeylêk bajarnê bînan ê Almanya  vizêr  bajarê Hannoverî de zî bi wesîleya 18ê Adare Roja Tepişteyanê Sîyasîyan ê Mîyanneteweyîyî çalakîya paştîdayîşî ameye kerdene.

Şewa dişemeyî îstasyonê trenan ê merkezî yê Hannoverî de bi  wesîleya Roja Tepişteyanê Sîyasîyan bi seyan kesî ameyî têhet û waşt wa heme tepişteyê sîyasîyî bêrê veradayene. Reyna azadîya Rayberê Şarê Kurdî Abdullah Ocalanî ameye waştene û bale ameye antene Hemleya Azadîye ser. Derheqê tepişteyanê sîyasîyan  yê Îran,Tirkîya, Almanya û herêmanê bînan ê dinya de eşkerayîye ameyî wendene.

Wext wextê xurtkerdişê têkoşînî yo

Aktîvîte de mesajê sîyasetmedarê kurdî Mehmet Çakasî yo ke zîndanê Hannover de sey rehînî yeno tepişene, ame wendene.

Mehmet Çakasî mesajê xo de verê amedekerdox û tewrbîyayoxê çalakîye selam kerdî û vat: ''Seke yeno zanayene Vakurkê Kurdîstanî û Tirkîya de rejîmê Erdoganî yo hêrişkar heme kurdan, elewîyan, sosyalîstan û rojnamegeran û heme kesan û awanîyan ê demokratîkan ser o zext keno, înan erzeno zîndanan û cezayanê giranan dano. Verî bi sebebanê ciya cîyayan nê zextî kerdêne la inkey heme muxalîfî û xoverdayoxî sey 'terorîst'î yenê sûcdarkerdene  û muhakemekerdene. Binê konseptê 'têkoşînê vera terorî' de kesê têkoşînê azadîya komelkî danê têna nînê sûcdarkerdene, wirdê yenê vînayene,teberê komelî de yenê îlankerdene. 

Ma verî dewleta almane û dezgehanê Yewîya Ewropa ra vera zextê dewleta tirke paştî waştêne. La roja ma de rewşa dewletan û endamanê Yewîya Ewropa bi xo rinde nîya. Menfeatê ekonîmîk-polîtîkî rîyê înan o raşt fîna meydan. Coka Ewropa de têkoşînê demokrasî û azadîye her wextî ra zafêr hewce keno. No zî bi paştdayîş û  yewîya hêzî mumkun o. Na çarçewa de ez aktîvîteya şima erjîyaye vînena û sey kurdê sosyalîstî, tepişteyê sîyasîyî vana bêşik ma do xover bidê, ma do  miheqeq ser bikewê. Ez şima pêrune bi rêzdarî selam kena. Newroz Piroz be!''

Tepişteynê sîyasîyan rê mektûb bişawê

Aktîvîstêka enternasyonalîstî nê vatî: ''Bi paştdayîşê dewlete rehîngirewtişê polîtîkî bîyî sey norm. Ganî ma wayîrê tepişteyan bivejîyê,  têkoşînê xo xurt bikerê  û warê mîyanneteweyî de biresnê pê. Nê semedî ra ganî ma tepişteyanê sîyasîyan rê kart û mektuban bişawê. Embazê ma Mehmet rê mektûb binusê. Mehmet kirdkî (zazakî), kirmankî, tirkî û biney almankî zano. Adresê ci wîna yo: Mehmet Çakas,schulenburger Landstraße 145, 30165 Hannover."

Polîsan hêrişê şarî kerd

Çalakwanan waşt şirê warê bînî de paştî bidê tepişteyanê sîyasîyan ê Meksîka zî la polîsan ê ke bi astor û kutikan tewrê aktîvîte bîyî,  hêrişê şarî kerd. Nizdê nîme saete dormeyê xeylêk cinîyan ame girewtene. Enternasyonalîstêk wextêk ame destbendkerdene û reyna ame veradayene. Aktîvîte haştîyane qedîyaye.