Çarçewaya çalakîya “Veng Bidê Azadîye” de merdimanê tepişteyan waşt Wezîrê Edaletî yê Tirkî reyde pêvînayîş bikerî la ameyî astengkerdene. Dayîkan vat, “Şima qebul bikerî zî mekerî zî, zîndanan de tecrîd est o.”
Çarçewaya çalakîya “Veng Bidê Azadîye” de ya ke semedê azadîya Rayberê Şarê Kurdî Abdullah Ocalanî dîyaye destpêkerdene de merdimanê tepişteyan, rêxistinanê komelê sîvîlî û temsîlkaranê partîyanê sîyasîyan ra heyetêk seba ke Wezîrê Edaletî yê Tirkî Yilmaz Tunçî reyde pêvînayîş bikero ame Anqara.
Grûba ke waşt ver bi wezîrîye rayra şiro hetê polîsan ra ameye astengkerdene. Wesayîtê merdimanê tepişteyan hetê polîsan ra ameye teqîpkerdene. Heyet herinda wezîrîye de şi meclîs. Dayîkê ke pîya bi wekîlanê DEM Partî ameyî verê meclîsî xeylêk wext wesayît de ameyî tepiştene û destûrê nêdîya vejî teber. Dima ke wesayîtî ra ameyî war raştê heqaretê polîsan ameyî. Tîya zî destur nêdîya merdimê tepişteyan Wezîrê Edaletî reyde pêvînayîş bikerê.
Wekîlê DEM Partî yê Mûşî Sirri Sakikî vera polîsan nêrazîbîyayîş mojna û vat, “Eke hewce bikero ma pêrodayîş zî kenê. Ewro dayîkî çi wazenê ma do nê bikerê. Ma paştî danê dayîkan.”
Dayîkan zî vera tewirê polîsan hêrsê xo ard ziwan û vat: “Ma semedê çareserî ameyî tîya. Biney goştarî ma bikerê. Domanê ma zîndanan de yê. Şima destur nêdanî ma qisey zî bikerê. Şima perûne rê ef vejenê, kiştoxan rê zî. La domananê ma zîndan de tepişene. Ma vanê wa tecrîd bêro wedaritene. Coka ma ameyî tîya. Ma bi waştişê vindarnayîşê gonî ameyî tîya. Muxatabê ma Wezîrê Edaletî yo, destur bidê ma ravîyarê.”
Merdimanê tepişteyan ke verê meclîsî de eşkerayîye daye destur nêdîya ke pankart bikerê. Wekîla DEM Partî Ceylane Akça vera nê hêrsê xo ard ziwan.
Meryeme Soyluya ke bi nameyê merdimanê tepişteyan qisey kerd ard ziwan ke ê bi waştişê wedaritişê tecrîdî çalakîye kenê û nê vatî:
“Şima qebul bikerî zî mekerî zî, zîndanan de tecrîd est o. Bîlasebeb merdiman tepişene, tecrîd kenê. Ma edalet û haştîye wazenê. Bi seyan polîsan dormeyê ma girewto ke ma meşirê wezîrîye. Heme kurdî binê tecîrdî de yê. Ma şer nêwazenê, ma vanê ne kurd û ne tirk wa bimiro. Ma semedê haştîye ameyî tîya. Waştişê haştîye sûc o? Ma 15-20 dayîk ê, bi seyan polîsan dormeyê ma girewt.”
Heyet badê eşkerayîye bi slogananê “Bijî berxwedanan zindanan!”, “Heq huqûq adalet” kewtî meclîsê tirkî.
