Keyeyanê tepişteyanê nêweşan û tepişteyanê ke înfazê înan ameyo vêşnayene, roja 206. de verê Zîndanê Amedî de çalakîya xo ya nobeta edaletî kerde.

Endam û îdarekaranê TUAY-DER, MEBYA-DER, MED-DER, HDP û DBPyî zî paştî daye çalakîye.

Çalakîye de verî wata tepişteyê nêweşî Hamdusena Ada, Reşahate Ada qisey kerd û vat: ''Wa hînî tedayê vera tepişteyan biqedê. Tepişteyê nêweşî nênê dermankerdene û rixmo ke cezaya înan qedîyaya vera nêdîyenê. Tepişteyan rê poşmanîye yena ferzkerdene. La domanê ma dewaya xo ra poşman nîyê. Ma do heta peynî serê dewaya domananê xo de bibê. Tepişteyî Nuar Kaymaz, Behçet Bayhan, Selahattîn Aslan, Arîf Onkol Zîndanê Amedî ra ameyê surgunkerdene. Wa no zulm biqedo. Tepişteyê ma surgunê şaristananê dûran kenê; ma rê zulm kenê.''

Dadîya Azîz Tufanî Yesûre Tufan zî çalakîye de qisey kerd û ard ziwan ke 4 tepişteyî srugunê şaristananê cîya-cîyayan ameyê kerdene. Dayîke Yesûre vat: ''Ma nê zulmî qebul nêkenê. Domanê ma surgun mekerê, ma rê zulm mekerê.''

Çalakîye bi sloganan qedîyaye.