Merdimanê tepişteyan û Komîsyonê Teqîbkerdişê Zîndanê Mêrdînî, seba azadîya tepişteyanê nêweşan verê bînaya ÎHDyî ya Mêrdînî de Nobeta Edaletî kerde. Nameyê komîsyonî ser o Gulîzare Îpek Bîlek eşkerayîye wende.

Îpeke vist vîrî ke her roje zîndanan de 'mergê şikdarî' qewimîyanê û serê cenazayanê tepişteyan de rêçê îşkenceyî est ê. Îpeke îfade kerd ke Dezgehê Tipê Edlîyî (ATK) pê raporanê xo yê negatîfan tepişteyan terkê mergî keno. Îpeke bale ante ser ke rixmo ke wayîrê heman nêweşîye yê fermandaro verên  ê artêşa tirke Çevîk Bîr vera dîya la Aysele Tugluk vera nêdîyena.

Îpeke pê hesna ke zîndanan de 48 tepişteyan bi hawayêkê şikdarî dinyaya xo bedilnaye û vat: ''Ganî tepişteyê nêweşî bêrê veradayene.''

Avûkat Lokman Emenî zî da zanayene ke înan wextê eşkerayîye de xebera mergê tepişte Îbrahîm Yildirimî girewta û vat: ''Heta ke îşkence, kiştiş û binpaykerdişî nêqedê ma do têkoşînê xo rê dewam bikerê.''