Nobeta Demokrasîyî ya Mêrdînî ya verba xespanê qeyûmî roja 48'ine de dewam kena. Çalakîye ewro qezaya Qoserî ya Mêrdînî de ameye viraştene û HDP'yîjî û şar tewrê ci bîyî. Çalakîya verê Meydanê Azadîye hûmara Mayê Haştîye zaf bale ante û deyîrî ameyî vatene.

 Dimayê çalakîya roniştişî Wekîla HDP'yî Dundare Roja Mamostayan ê Cihanî fîraz kerde û derheqê perwerdekaranê ke têkoşînê  ziwanê dayîke dayê de qisey kerd. Dundarî bale ante serê mesele yê ziwanê dayîke û qedexekerdişê Kurdkî û vat: "Merdimî hema zî seba ke deyîranê bi Kurdkî vanê yenê destbendkerdene. Îqtîdar deyîranê ma ra terseno. Cara tarîxê îqtîdarî wina yo. Merdimê ke Kurdkî qisey kenê teda vînenê. Tarîxê qeyûmî zî wina yo. Qeyûmî zî dibistanê ma ke bi Kurdkî perwerde dayêne padayî. La ma ziwanê xo ra fek vera nêdanê. Ma têkoşînê xo yê ziwanê dayîke rê do dewam bikê."

Dundarî derheqê fezlekeyanê wekîlanê HDP'yî de zî qisey kerd û va: " 75 hebî zî ney, şima bi hezaran fezlekeyî zî amade bikê, ma do têkoşînê demokrasîyî ra fek vera nêdê. Ma do sîya rê nêvajê sipî."

Eşkerayîye bi sloganê "Ma do pê xoverdayîşî ser bikewê" qedîyaye.