Bajarê Kolnî yê Almanya de merhaleya diyîne ya hemleya Abdullah Ocalanî rê azadîye û meseleya kurdan rê çareserîya sîyasîye de kombîyayîş ame kerdene.

Merhaleya verêne ya hamle 10ê teşrîna verêne ya 2023yî de hetê kurdan û dostanê înan ra bi kombîyayîşanê çapemenîye û aktîvîteyanê cîya cîyayan yê 100 bajaran amebî eşkerakerdene.

Destpêkerdişê na hemle ra nata bêmabên çalakîyî û kampanyayî ameyî rayraberdene. Pîya bi rayraşîyayîşan bi kampanyaya şawitişê 100 kartan her hetî ra Îmraliyî rê kartî ameyî şawitene.

Çarçewaya hemle de Koln de rayraşîyayîşo gird ame kerdene û bi eynî waştişî zîndanan de grevê vêşanîye û xeylêk bajaranê Kurdîstan û Tirkîya de Nobetê Edaletî dewam kenê.

Eşkerayîya ke kurdkî, tirkî, almankî û îngîlîzkî ameye dayene de ame vatene ke 8ê Adare Roja Cinîyan ê Kedkeran a Dinya, 4ê Nîsane Rojbîyayîşê Abdullah Ocalanî û 1ê Gulane Roja Kedkaran do merkezê  na hamle de bêrê pêşwazîkerdene.

Eşkerayîya çapemenîye de wina ame vatene: ''Bi rayraşîyayîşanê bi se hezaran kesan do azadîya Abdullah Ocalanî bêro waştene û şirê dewleta tirke ser ke berê Îmraliyî abikero. Semedê çareserkerdişê meseleya kurdan ganî Abdullah Ocalan azad bo ke bieşko muzakereyan bikero. Vera sîstemê îşkenceyî yê Îmraliyî û hêrişanê vera kurdan ganî têkoşîn bêro xurtkerdene.''

Dîya zanayene ke merhaleya diyîne ya hemle de do verê CPTyî de çalakîyî bêrê kerdene.

Eşkerayîye de bitaybetî veng dîya Almanya ke wa hemkarîya xo bi Tirkîya caverde.