Dimayê erdlerzî ke Mereşê Kurdistanî de virazîya, sey her hetê Ewropa, Swîsre de zî hetê Heyva Sor a Kurdîstanî, Konseya Kurdanê Demokratîkan ê Swîsre (CDK-S), Têgêrayîşê Cinîyan ê Kurdan ê Swîsre  (YJK-S), Kongreya Demokratîke ya Şaran (HDK)  Swîsre û Federasyonê Komeleyan ê Demokratîkan ê Mereşî (MARDEF) ra koordînasyonê krîzî ame roneyene. Koordînasyonî  kombîyayîşî ra dima eşkerayîye daye û dîyar kerd ke no çîyo ke ameyo kerdene, qatlîam o.

Qiseykerdoxan dîyar kerd ke ê sey Merkezê Koordînasyonê Krîzî yê Swîsre, Koordînasyonê krîzî ke hetê HDPyî ra ameyo ronayene, pîya têkilîye de yê û şaredar û sazgehanê cîya-cîyayan yê Swîsre reyde seba hetkarîya Heyva Sor a Kurdistanî kombîyayîşan kenê. 

Kombîyayîşî de nê çîyî ameyî eşkerakerdene, ‘‘Heta nika  komêk ciwanî seba hetkarîya mexdûran şîyî herême, koma diyine zî kewt rayîr. 38 hezar frankî ke heta nika ameyî arêdayene resayî cayê hetkarîye. Sewbîna 3 kamyon kelûmel zî sewqê Koordînasyonê Krîzî yê HDPyî bîyî. Do hîna zaf hetkarîyî bêrê erşawitene.’’

Nameyê Merkezê Koordînasyonê  Krîzî ser o Zeynel Demîrî wina qisey kerd: ‘‘Erdlerzî ra dima heme sazgehê Kurdistanî dekewtê gêrayîş û têwgêrêk mîyan û bi dostanê xo xebitênê. Ma do pîya maxdûrtîya şarê xo bipêşê. Destê ma ra çî bêro, ma do bikerê. 

Paştî bidê Kampanyaya Heyva Sor a Kurdîstanî

Hemsereka CDK-Syî û Endama Merkezê Koordînasyonê Krîzî Selma Surer zî seba paştîdayîşê kampanyaya Heyva Sor a Kurdistanî venga şarî da û da zanayene ke heme meclîsê înan bi ruhê seferberîye xebitênê.

Seba melumatan şima eşkenê xo biresnê nê numre û lînkî

https://heyvasor.ch/donations/donation-form/  

0041 788 09 43 47.