1’ê Gulane Roja Kedkaran do emser Stenbol de meydanê Pazarî yê Bakirkoyî de bêro pîrozkerdene. Partîya Demokratîk a Şaran (HDP) do çalakîya 1’ê Gulane de bale bianco serê grevanê vêşanîye. Bi nê amacî zî do bi şîyarê ‘mexmela xo ya sipîye bigîre û bêre meydan’ tewrê çalakîyanê 1’ê Gulane bibo.

Hemserekê HDP’yî yê Stenbolî Cengîz Çîçekî derheqê sebebê tewrbîyayîşê endamanê partîya înan ê bi mexmelanê sipîyan vat, “Mexmela sipîye tena mexmele nêya ke mayê Kurdî danê sereyê xo, mexmelê sipîyî nîşanê aşitî û biratîya welatî yê. Ganî no nişan rind bêro ercnayene. Mayê ma yê ke nika vernîya Zîndanê Gebze de rastê heqaret û tacîzê polîsan yenê, bale ancenê çîyêk ser o: wa domanê ma memirê.

Gama ke domanê înan memirê, do domanê şaranê bînan zî memirê. Gama ke domanê înan memirê, do tayê hetî nêeşkê serê mergê leşkeran ra îqtîdarê xo xurt bikerê. Do atmosferêkê lînçî nêvejîyo werte. Rasta ci, mexmela sipîye jehrkiştoxa heme xirabîyan a. Do bibo jehrkiştoxa tarîtîye. Ma neçar ê ke 1’ê Gulane de bibê wayîrê na jehrkiştoxe.”

Nizdbîyayîşê Hemverê Ocalanî Nizdbîyayîşê Hemverê Kurdan o

Çîçekî dewamê qiseykerdişê xo de bale ante serê muhîmîya Ocalanî ya seba Kurdan û têgêrayîşê azadîye û vat, “Nê demî de ganî ma ramojnê ke nizdbîyayîşê hemverê ê, nizdbîyayîşê hemverê şarê Kurdî yo. Naye ra ganî ma seba ke grevê vêşanîye yê ke bi serkêşîya Leyla Guvene dest pêkerdîbî bêrê dîyene cehd bikerê. Ma wazenê 1’ê Gulane rind bişuxulnê. Ganî xeta mucadeleyê hemparî bêro xurtkerdene. Ma dî, gama ke mucadeleyê azadîye û mucadeleyê kedaran reseno pê, ma eşkenê heme zor û zehmetîyan raste ra wedarê.”

‘Mexmela Sipîye Yena Manaya Mucadeleyê Azadîye’

Çîçekî derheqê slogana xo ya 1’ê Gulane de zî nê vatî: “Mexmela sipîye seba ma yena manaya aşitîye, yena manaya mucadeleyê azadîye. Mexmela sipîye seba ma seypêyîye ya, edalet o. Ma kenê ke seypêyîye û edaletî bi mexmela sipîye bîyarê vîrî.”

Çîçekî tewr peynî de veng da kedkar û Kurdanê Stenbolî ke 1’ê Gulane de verê xo bidê meydanê Pazarî yê Bakirkoyî û mucadeleyî xurt bikerê.