Hemserekanê verênan ê HDPyî Fîgene Yuksekdag û Selahattîn Demîrtaşî seba ke huqûqê zereyî de qey îtîrazkerdişî hetkarîyêka hole nêgirewte muracatê Mehkemeya Heqanê Merdiman a Ewropa (MHME) kerdbî. MHME muracatî ser o bire daye ke Tirkîya Peymana Heqanê Merdiman a Ewropa (PHME) binpay kerda.

MHME bire daye ke babeta prosesanê îtîrazî yê huqûqê zereyî de heqê Yuksekdage û Demîrtaşî ameyo binpaykerdene. MHME bira xo de vat ke Yuksekdage û Demîrtaşî gerre kerd ke 'selahîyetdarê zîndanî pêvînayîşanê înan ê bi avûkatan teqîb kenê û dest nanê belgeyanê avûkatan ser.'