Hemkaranê îqtîdarî ra û Serekê MHPyî Devlet Bahçelîyî kombîyayîşêkê çapemenîye de derheqê dewaya cînayetê Sînan Ateşî de qisey kerd û vat ke destê înan de lîsteya nameyanê 154 rojnameger û sîyasetmedaran est a. Bahçelîyî vat ke ê do nê 154 kesan teqîb bikerê û ''verê mehkemeyan'' de vera nê kesan têbigêrê. Muxalefet û xeylêk kesayetan vera nê qiseyanê Bahçelîyî nêrazîbîyayîşê xo mojna.

Rojnameger-nuştox û endamê Meclîsê Partîye yê DEM Partî Ender Îmrekî derheqê babete de ANFyî rê qisey kerd. Îmrekî vat: ''Cînayetê Sînan Ateşî mojneno ke MHP bîyo meseleyêka cidîye. MHP hêzê îqtîdarî şuxilneno û seke wayîrê dewlete yo, bêhuqûqîye rê dewam keno. Cînayetê Sînan Ateşî bi eşkerayîyanê keyeyê ci, agahîyan û belgeyan bi hawayêkê eşkerayî werte de yo. Rixmê nînan zî şuxilnayîşê rayîr û metodanê mafyatîk û faşîzanan xîret kenê ke keyeyê Ateşî, rojnameger, sîyasetmedar, roşnvîr û hunermendan bêveng bikerê.

MHP bîyo meseleyêka Tirkîya. Bahçelî hema zî vano ke wa Mehkemeya Qanûnê Bingeyînî bêra qefilnayene, DEM Partî bêra qefilnayene. MHP her kesî tehdît keno. MHP partîyêka winayêne ya ke seba ke raştîyêke deşîfre nêba  huqûqnas, nuştox û rojnamegeran tehdît keno. La roşnvîr, rojnameger û sîyasetmedarî do vera gefan sereyê xo nêarê war.''