Şaredarîya Miksî ya Wanî 29ê teşrîna peyêne de amebi xespkerdene. Miks de vera darbeya qeyûman nobeta şarî roja 3yîne de dewam kena. Şaristan de bi şîarê ''Qeyûm talan o, xoverdayîş cuye yo'' rayraşîyayîş ame kerdene.

Wekîlê DEM Partî Mahmut Dîndar, hemşaredarê qezayan û Wanî û temsîlkarê dezgehan zî tewrê rayraşîyayîşî bîyî. 

Dima Hemşaredarê Miksî Ayvaz Haziro ke herinda ci de qeyûm amebi tayînkerdene qisey kerd û ard ziwan ê do qetî xoverdayîşî ra anêgêrê û oyo ke ayîdê şarî yo apey bigêrê.

Hemşaredare Nebahate Benek îfade kerd ke ê do têkoşîn bikerê û şaredarîye teslîm nekerê.

Wekîl Dîndarî vat: ''Îqtîdarê AKP-MHPyî polîtîkaya înkar û îmha ano ca. 50 serrî yo nê polîtîkayî ser nêkewtî. Şar do bi zûran nêxapîyo.''

Hemsereka DEM Partî ya Wanî Gulşene Kurt vat: ''Şar haştîye wazeno la şima barîyeran nano ro. Şima huqûqî binpay kenê. Senî ke şarê ma vizêr vera qeyûman vejîyabi ewro zî do vejîyo û paştî bido weçîniteyan.''

Dima çalakîya roniştişî ameye kerdene. Çalakîya nobete bi zîyaretan dewam kena.