Partîya Demokrasîyî û Têdûştîye ya Şaran DEM Partî Meydanê Esenyurtî yê Îstanbulî de mîtîng keno. Mîgîngê Azadîye û Demokrasîyî Mîtîng de Posterê Rayberê Şarê Kurdî Abdullah Ocalanî ame akerdene.

Sîyasetmedaranê ke semedê azadîya fîzîkîye ya Abdullah Ocalanî Rayraşîyayîşê Azadîye yo Pîl kerd, ê zî tewrê mîtîngî bîyî. Raywanê Rayraşîyayîşê Pîlî û dayîkê ke bi eynî waştîşî Nobeta Edaletî tepişenî pîya şar selam kerd.

Hemserekê Pêroyî yê DBPyî Keskin Bayindirî mitîng de qisey kerd. Bayindirî ard ziwan ke netîceya polîtîya qirkere de dewê kurdan ameyî xirakerdene ke şarê kurdî erdî xo caverdo ke qoqê xo ra bêro raqilnayene û vat  şima vînenê kurdê ke mecbûr mendê dewanê xo ra vejîyayî ewro senî nê meydan wayîrê erjanê xo vejîyenê.

Bayindirî wina dewam kerd: ''Ewro Îstanbul veng dano Rayraşîyayîşê Azadîye. Kurdîstan û Tirkîya azadîya Rayberê Şarê Kurdî Abdullah Ocalanî wazenê. Ziwanê me qedexe kenê, vanê têna keye de ziwanê xo qisey bikerê. Ma ewro tîya ra bi ziwanê xo qisey kenê. Ma kurd ê, kurdîstanij ê.

Ewro roja azadîya û serkewtişî ya. Ewro roja payan ser vindertişî ya.  Roje roja ma ya. Zîndanan de hîrê mengî yo grevê vêşanîye est a. No grev semedê azadîya ma yeno kerdene.  Bi desan zîndana de bi hezaran hemrayê ma grevê vêşanîye de yê. Ê zîndan de ma kuçeyan de xover danê. Ma xoverdayîşê zîndanan selam kenê. Ma vera zilmî xover danê. Ma 100 serre milê xo çewt nêkerd, ewro ra tepîya zî do çewt mekerê. Êyê ke hesabanê xelatan kenê wa biewnê nê meydanî ra.

Zaf dûrî nîyo. Ma do berê Îmraliyî bişiknê û çareserîye bîyare. Ma nê tecrîdî qebul nêkenê. Eke şima şer û dişmenîye nêwazenê nê tecrîdî wedarê.  Muxatabê kurdan bewlî yo. O zî Birêz Ocalan o. Ma tîya ra Îmraliyî rê selamanê xo şawenê. Têkoşînê ma yê Kurdîstanî do ser bikewo.''