Partîya Çep a Keske bi beşdarîya namzeda xo ya wekîlîye Aytene Kordu, Hemvervatoxa partîye Çîgdeme Kiliçgun Uçar, Hemserekê DBPyî Keskîn Bayindir, Serekê EMEPî Ercument Aydenîz, temsîlkarê KKPyî Mustafa Korkmaz, temsîlkarê PSKyî Mesut Tek û Başake Demîrtaş Meydanê Seyîd Rizayî yê Dêrsimî de mîtîngê xo kerd.

Heyet Pirdê Mazgêrdî de hetê konvoyê wesayîtan ra ame pêşwazîkerdene. Heyet bi sloganê 'Jin, Jiyan, Azadî' kewt mîtîng. Meydanê Seyîd Rizayî bi alayanê Partîya Çep a Keske xemilîya. Şarê Dêrsimî pankarta ''1095 rojî bê Gulîstane Doku derbaz bîyê. Ma do xo vîr a nêkerê'' û ''Pêro cuya ma pê şerî derbaz bîye. Şerwanê merdimatîye azadîye afernene'' akerde.

Mîtîng de hêverî Mesut Tekî qisey kerd û pare kerd ke 14ê gulane de Dêrsim do îradeyê xo bimojno. Tekî vat: ''Ma qirkerdişê pîlî dîyê. Ganî ma bikerê ke nê qirkerdişî tekrar nêbê. Heta ke meseleya kurdan çareser nêba zî Tirkîya do demokratîk nêbaç''

Dima Mustafa Korkmazî qisey kerd û îfade kerd ke senî ke Seyîd Riza çok nêşîyo erdî ro, şarê Dêrsimî zî do çok nêşoro erdî ro. Korkmazî vat: ''Îtîfaqê Kurdîstanî wazeno qeyûman bişawo, îradeyê şarî aver bero, tepişteyan azad bikero, ziwanê kurdkî bikero ziwanê perwerdeyî û fermî.''

Namzede Aytene Kordu ard ziwan ke rejîmê tekcamêrdî dişmenê nasnameyan û demokrasî yo û vat: ''Se serrî yo sîyasetê înkarî yeno kerdene. AKP 21 serrî yo wazeno faşîzm mende bikero. Ma safhayêka girînge ra derbaz benê. Ma do heta çareserîye têkoşîn biikerê. Dêrsim de bêkarîye, koçberîye û xizanîye est a. Ma do pîya nê rejîmî bişawê. Ma do na hişmendîye rê vajo hînî bes o. Ma do pîya bivurnê.''

Ercument Akdenîzî vat ke şarê Dêrsimî wa rayêke bido Partîya Çep a Keske û rayêke zî bido Kiliçdarogluyî.

Hemserekê DBPyî Keskîn Bayindirî vat: ''Tîya Dêrsim o. Rayîr nêdano zulmî. Reng û vengê şarê Dêrsimî Partîya Çep a Keske de yê. Morê xo bidê binê dara ma ro.''

Başake Demîrtaş zî vejîyaye sehne ser, selamê Selahattîn Demîrtaş û Selçuk Mizrakliyî resnayî şarî.

Hemvervatoxa Partîya Çep a Keske Çîgdeme Kiliçgun Uçar mîtîng de bi kirmanckî qisey kerd û vat: ''Erdogan elewîyan sey 'tewirêkî' pênase keno. Hişmendîya înan pê bawerîya elewîyan û nasnameyê kurdan do nêeşka. Na bawerîya qedîme do înan bişawa.''