Partîya Çep a Keske çarçewa xebatanê weçînayîşî de Îstanbul de mîtîngê cinîyan kerd. Cinîyî pê şîarê ''Ma tîya de yê, cinîyan reyde bivurnê'' û bi sloganê ''Jin, Jiyan, Azadî'' pê kincanê xo yê neteweyîyan Parka Yogurtçuyî ya Kadikoyî de tewrê mîtîngî bîyî. 

Meydanê mîtîngî de fotografê Garîbe Gezer û Denîze Poyraz ameyî daliqnayene. Cinîyê ke wazenê bibê muşahîdî mîtîng de qeyd bîyî. 

Mîtîng de hêverî seba cinîyanê ke ameyê qetilkerdene deqayêk rêz ame girewtene. Dima Îdarekara Rêxistina Partîya Çep a keske ya Îstanbulî Îsmaîl Temel û Hemsereka ESPyî Ozleme Gumuştaş qisey kerd. Înan pare kerd ke cinîyî qetî do bi têkoşînê xo ser bikewê û heqanê xo yê xespkerdeyan apey bivisnê destî.

Dima namzedanê cinîyan sehne de girse selam kerd. 

Hemvervatoxa Partîya Çep a Keske Çîgdeme Kiliçgun Uçar zî mîtîng de qisey kerd û îfade kerd ke cinîyî do bi serkewtişê xo rejîmê tekcamêrdî bin bivisnê. Çîgdeme vat: ''Ma soz daye Mayanê Haştîye, Îpeke Er, Denîze Poyraz, Leyla Guven û Gultane Kişanakan ke ser bikewê. Partîya Çep a Keske do rengê cinîyan û sîstemê hemserekîye tim bipawê. Ma do wezîrîya cinîyan awan bikerê, Peymana Îstanbulî apey bivisnê dewre, vera edaletê camêrdan Mehkemeya Îstîsatî ya Cinîyan awan bikerê.

Devlet Bahçelîyî vato 'Ma do ya cezaya muebede yan zî guleyan bidê înan. Ma do Bahçelîyî bişawê, cinîyan bîyarê. Cinîyî pêro wa şorê sindoqan ser. Rejîmê tekcamêrdî seba şîyayîşî amade nîyo la cinîyî seba binvistişî amade yê. Ma do pîya bivurnê!''

Mîtîngî ra dima polîsan hêrişê cinîyan kerd û pê şîdetî 4 kesî destbend kerdî. Cinîyan pê sloganê 'Jin, Jiyan, Azadî' hêrişê polîsan şermezar kerd.